Atyraýda túlekterdiń tyıym salynǵan zattardy kóptep alyp kelýinen UBT úsh saǵat kesh bastaldy
ASTANA. QazAqparat - Elimizde Ulttyq biryńǵaı testileý bastaldy. Bıylǵy synaqqa qatysýǵa 92 myńnan astam túlek nıet bildirgen.
Bilim synaǵy maýsymnyń 8-ne deıin ótedi. Oǵan jaýapty Bilim mınıstrligi maǵynasyz saýaldardy alyp tastap, qosymsha 14 myń saýal engizdik dep otyr. Al suraqtar óte qupııa ustalsa da, olardyń sýreti áleýmettik jelilerde jarııalanýda. Búgin túlekterdiń biraz qýlyǵy da áshkere boldy, dep habarlaıdy KTK telearnasy.
Talapkerler testke kirmes buryn tyńǵylyqty tekserýden ótti. Bul «shpargalka» nemese baılanys quraldaryn aýdıtorııaǵa jibermeýdiń amaly. Jalpy synaqtyń alǵashqy kúni 28 myń túlek test tapsyrdy. Al maýsymnyń 8-ne deıin jalǵasatyn emtıhanǵa bıyl 92 077 oqýshy nıet bildiripti. Olardyń 4490-ynyń «Altyn belgiden» úmiti bar. Sondaı-aq mınıstrlik ókilderi UBT 2015 jyly alynyp tastalady degen aqparatty joqqa shyǵardy. Tek synaq eki kezeńge bólinip, Ulttyq testileý jáne keshendi testileý júrgizilmekshi.
- Bilim berý júıesiniń 2020 jylǵa deıingi baǵdarlamasynda 2015 jyldan keıin osy mektepti bitirý jáne qabyldaý emtıhandaryna ózgeris engizý qajet degen. Bul máseleni qazir arnaıy komıssııa talqylap jatyr. 2016 jyldan bastap enetin bolsa, nátıjesin aıtamyz, -deıdi QR Bilim jáne ǵylym vıtse-mınıstri Tahır Balyqbaev.
Tek UBT bıyl da yń-shyńsyz bastala qoıǵan joq. Elimizdiń barlyq óńirlerinde saǵat tili tańǵy 9-dy kórsetkende synaq bastalsa, atyraýlyq talapkerler bul ýaqytta aýdıtorııaǵa kire almady. Olar 3 saǵattan keıin ǵana qoldaryna qalam alyp, jaýap berýge kirisken. Bunyń sebebi túlekterdiń ózderimen birge tyıym salynǵan zattardy kóptep alyp kelýinde.
Al Almatyda synaq tapsyrǵandardyń ata-analary syrtta qaýmalap, ul-qyzdarynyń bolashaǵyn oılap alańdaýda. Olar úshin arnaıy monıtor ornatylyp, onlaın rejimde barlyǵy kórsetildi. Qan qysymy kóterilip, ózin jaısyz sezingenderge jedel-járdem de tabyldy. Al 3 jarym saǵatta 125 suraqtyń jaýabyn tapqandardy ata-ana men aǵaıyn-baýyr qoshemetpen qarsy aldy.
«Aldaǵy 7 kúnde tek bap qana emes, baq ta qatar shabatyn synaqtyń taǵy 3 legi ótedi. Aıta keterligi, bıyl Ulttyq biryńǵaı testileýdi uıymdastyrý isine ózgeris engizilmegen. Mektep bitirýshi burynǵydaı keminde 50-den joǵary upaı jınaýy tıis. Al Ulttyq ýnıversıtetke túsý úshin bul kórsetkish 70-ten asýy qajet.
