Atyraýda týa bitken patologııasy bar balaǵa kúrdeli ota jasaldy
ATYRAÝ. QazAqparat – Atyraýda týa bitti patologııasy bar balaǵa kúrdeli ota jasaldy, dep habarlaıdy QazAqparat.
Oblystyq densaýlyq saqtaý basqarmasynyń baspasóz qyzmetinen málim etkendeı, oblystyq balalar aýrýhanasynyń neırohırýrgtary 4 aılyq balanyń basyna jasaǵan kúrdeli ota sátti ótken.
«Anasy balasynyń bas pishinindegi dısproportsııany baıqaǵan. Bala eki aıǵa tolǵanda anasyna neırohırýrg keńes bergen. Keıin balaǵa «bas súıeginiń týa bitken patologııasy», «sagıtaldy kranıostenoz» dıagnozy qoıyldy» - dep habarlady basqarmanyń baspasóz qyzmeti.
Dárigerlerdiń aıtýynsha, týa bitken patologııa kezinde bas dısproportsııa óse bastaıdy. Sol balaǵa josparly hırýrgııalyq emdeý, sondaı-aq, kranıotomııa usynylǵan.
«Otadan keıin dárigerler naýqastyń jasyna sáıkes bas pishininiń proportsııalaryn ornyna keltirdi. Biraz ýaqyttan keıin bala úıine shyǵaryldy», - dep málim etti basqarmanyń baspasóz qyzmetinen.
Eske sala ketelik, buǵan deıin Atyraýda 4-shi qabattan qulaǵan bala tiri qalǵanyn habarlaǵan bolatynbyz.
