Atyraýda transulttyq uıymdasqan top músheleri sottaldy
ASTANA. QazAqparat - Atyraý oblysynyń qylmystyq ister jónindegi mamandandyrylǵan aýdanaralyq sotynda zańsyz kóshi-qon jolyn uıymdastyrǵan 5 Qazaqstan men Reseı azamattaryna qatysty qylmystyq isti qarady.
Olar2015 jyldyń qazany men 2016 jyldyń naýryz aıy aralyǵynda Aýǵanstan Islam Respýblıkalarynyń azamattaryn tranzıtpen Qazaqstan, ári qaraı Mýrmansk oblysyndaǵy «Soltústik marshrýt» dep atalatyn Reseı-Fınlıandııa shekarasy arqyly Reseı, Eýropalyq Odaq elderine jetkizip otyrǵan, dep habarlaıdy «QazAqparat» HAA tilshisi.
Atyraý oblysynyń qylmystyq ister jónindegi mamandandyrylǵan aýdanaralyq soty baspasóz qyzmetiniń málimetinshe, oblystyq UQKD anyqtaǵandaı, uıymdasqan top shetel azamattaryn arnaıy jasaqtalǵan jospar boıynsha tasymaldaǵan jáne qylmystyq toptyń barlyq múshesiniń atqaratyn qyzmetteri naqty bólingen.
Shetel azamattaryn arnaıy tasymaldaý úshin olardy Qazaqstan-Reseı shekarasyna jetkizetin taksı júrgizýshisin jaldaǵan. Qylmystyq top basshysy R.J. jáne tergeýde anyqtalmaǵan Reseı Federatsııasy men Aýǵanstan Islam Respýblıkasynyń azamattary bolǵan.
Sot úkimimen tórt sottalýshy QR QK-niń 264, 394 baptary boıynsha kináli dep tanyldy. Sottalýshy R.J.-ǵa túzeý kolonııasynyń qatań rejıminde 10 jylǵa bas bostandyǵynan aıyrý jazasy, qalǵan sottalýshylar A.T., K.K., O.M-ǵa múlikterin tárkileı otyryp, túzeý kolonııasynyń jalpy tártibinde 8 jylǵa bas bostandyǵynan aıyrý jazasy taǵaıyndaldy. Taksıst rólindegi taǵy bir sybaılas A.B.-ǵa adamdar tobynyń aldyn ala sóz baılasýy arqyly zańsyz kóshi-qondy uıymdastyrǵany úshin 3 jyl merzimge bas bostandyǵynan shekteý jazasy taǵaıyndaldy.
Sot úkimi zańdy kúshine engen joq.
