Atyraýda Tramadol satyp júrgen áıel ustaldy

ATYRAÝ. QazAqparat – Atyraýda quramynda esirtki zaty bar Tramadol dárilik preparatynyń 100 danasyn zańsyz satqan 44 jastaǵy áıel ustaldy, dep habarlaıdy QazAqparat.

Atyraý oblystyq Polıtsııa departamentiniń bastyǵy Qamza Úmbetqalıevtiń aıtýynsha, 29 qarashada «Dármek» is-sharasy kezinde dárini zańsyz satqan turǵyn anyqtalǵan.

«Esirtki qylmysyna qarsy is-qımyl basqarmasynyń qyzmetkerleri Atyraý qalasyndaǵy Altaı kóshesinde 1977 jyly týǵan azamatshany ustady. Onyń 100 dana Tramadol men 63 dana Trapıkamed dári-dármekterin zańsyz satyp júrgeni belgili boldy.

Qazir ustalǵan azamatshaǵa qatysty QR Ákimshilik quqyqbuzýshylyq týraly kodeksiniń 426-babymen (Farmatsevtıkalyq qyzmettiń jáne dárilik zattardyń, medıtsınalyq maqsattaǵy buıymdar men medıtsınalyq tehnıkalyq aınalysy salasynyń qaǵıdalaryn buzý) toltyrylǵan is-qujattary Medıtsınalyq jáne farmatsevtıkalyq baqylaý komıtetiniń oblystyq departamentine sheshim qabyldaý úshin joldandy», - deıdi Qamza Úmbetqalıev.

Eske sala ketelik, budan buryn Atyraý oblysynyń turǵyny 1 kelige jýyq esirtkimen ustalǵanyn jazǵan edik.