Atyraýda tramadol men tropıkamed preparatyn zańsyz satqan 6 adam ustaldy
Oblystyq polıtsııa departamentiniń baspasóz qyzmetinen málim etkendeı, «Dármek» is-sharasy kezinde psıhotroptyq preparattardy satqan 6 adam anyqtalǵan.
«Іshki ister mınıstrliginen lıtsenzııa alǵan kásipkerlik sýbektilerdiń esirtki quraldary, psıhotroptyq zattar men prekýrsorlardy saqtaýǵa arnalǵan nysandary men tehnıkalyq nyǵaıtylýy boıynsha qoıylatyn talaptaryna tekserý júrgizildi. Tekserý kezinde Atyraý qalasynda ornalasqan munaı burǵylaýmen aınalysatyn kompanııanyń prekýrsorlardy saqtaıtyn qoımasynyń tehnıkalyq nyǵaıtylýy zańdy talaptarǵa sáıkes kelmeıtini anyqtalyp, 9 884 tonna tuz qyshqyly tárkilendi. Osyǵan baılanysty QR Ákimshilik quqyq buzý týraly kodeksiniń 427-babynyń 1-bólimimen is qujattary jınaqtalyp, protsessýaldy sheshim qabyldanyp jatyr. Sondaı-aq, atalǵan qujattyń 426 jáne 464-babynyń 1-bóliminde kórsetilgen ákimshilik quqyq buzý faktisine jol bergeni úshin dárihana men JShS uıymdaryna arnaıy is qujattar jınaqtaldy», -dep habarlady departamenttiń baspasóz qyzmetinen.
Atyraý qalasynda júıkege kúshti áser etetin, ashyq satýǵa tyıym salynǵan tramadol jáne tropıkamed psıhotroptyq preparattaryn zańsyz satyp júrgen 6 adam ustalǵan.
Olardan 264 tramadol, 183 tropıkamed dárilik preparattary tárkilenip, QR Ákimshilik quqyq buzý týraly kodeksiniń 426-babynyń 1-bólimimen hattama jasaldy.
Eske sala ketelik, buǵan deıin Atyraýda izdeýde júrgen kúdikti psıhotroptyq dárilerdi zańsyz tasymaldaǵanyn habarlaǵan bolatynbyz.
