Atyraýda tozyǵy jetken jylý qazandyqtary jańartylady
Bul týraly oblys ákiminiń tóraǵalyǵymen ótken óńirdegi jylý berý maýsymynyń ahýaly týraly jıynda Atyraý qalasynyń ákimi Meıirim Qalaýı málim etti.
«Atyraý qalasyndaǵy tozyǵy jetip turǵan jeke jylý qazandyqtary arqyly qamtylatyn kópqabatty turǵyn úılerdi jylý jáne ystyq sý jelileriniń qýatyn arttyrý úshin qosalqy 3 jylý qazandyǵyn satyp alýǵa ashyq elektrondyq konkýrs jarııalanyp, jeńimpaz merdiger mekeme anyqtaldy. Merdiger mekememen kelisimshart negizinde 1 jylý qazandyǵy «Tulpar» shaǵyn aýdanyna qoıyldy. Bul qazandyq 8 kópqabatty úıdi qamtıdy. Memlekettik satyp alý jumystarynyń baıaýlyǵyna baılanysty 2 jylý qazandyǵy endi jetkizildi. Qazir 2 jylý qazandyǵyn montajdaý jumystary bastaldy. Eki jylý qazandyǵy «Nursaıa», «Bolashaq» shaǵyn aýdandaryndaǵy 13 úıdi qamtıtyn bolady», -dedi Meıirim Qalaýı.
Onyń aıtýynsha, «Nursaıa» shaǵyn aýdanynda jylý qazandyǵynyń joqtyǵynan jylýmen qamtýda qıyndyq týyndaǵan. Merdiger mekeme rezevrtegi jylý qazandyǵyn ornatyp, iske qosady.
Oblys ákimi Serik Shápkenov qala ákimi Meıirim Qalaýıge jylý berý maýsymyn esh kedergisiz ótkizý úshin kemshilikterdi joıyp, jumysty durys úılestirýdi tapsyrdy.
«Munda kóterilgen máselelerdiń bári de ózekti. Biz áriptesterimizdiń «áleýmettik nysandardaǵy rezervtik jylý qazandyǵy tekserilip, jylý berý maýsymyna daıyn» degen sózine sendik. Qalanyń aýmaǵynda barlyǵy ár salaǵa bólinip, óz betimen jumys istese sizdiń fýnktsıonaldyq mindetińiz qandaı bolmaq? Barlyǵynyń qasynda siz de bolyp, baqylaýdy kúsheıtýińiz qajet. Ár mekeme óz jumysymen tıisti deńgeıde aınalysýy tıis. Alaıda, olardyń jaýapsyzdyǵynan bul is qaıta aınalyp ózimizge keldi. Eger áriptester arasynan jumysyna nemquraıly qaraǵandar bolsa, onda dereý sharasyn alý qajet. Sondyqtan kóterilgen máselelerde qadaǵalaýdy kúsheıtý kerek», -dedi Serik Shápkenov.
Eske sala ketelik, buǵan deıin Atyraýda 9 kópqabatty turǵyn úı birneshe saǵat jylýsyz qalǵanyn jazǵan edik.
Foto: Óńirlik kommýnıkatsııalar qyzmeti