Atyraýda tótenshe jaǵdaı talaptaryn elemegen dámhanalar anyqtaldy
ATYRAÝ. QazAqparat – Atyraýda tótenshe jaǵdaıǵa baılanysty engizilgen arnaıy shekteýlerge qaramastan, jekelegen dámhanalar jumys rejımin buzyp kelgen, dep habarlaıdy QazAqparat.
«Tótenshe jaǵdaı engizilgennen keıin birqatar shekteý qoıyldy. Sonyń ishinde meıramhanalar men kafeler túngi saǵat 22.00-den keıin jumysyn toqtatýy tıis. Alaıda, arnaıy shekteýdi elemeı, jumysyn jalǵastyrǵan kafeler bar. Bizdiń qyzmetkerler ákimshilik quqyq buzýshylyqqa jatatyn osyndaı 2 faktini anyqtady. Materıaldar ákimshilik sotta qaralyp, mekeme ıeleri jaýapkershilikke tartylady», - dedi búgin Atyraý oblystyq Polıtsııa departamenti Jergilikti polıtsııa qyzmeti basqarmasynyń bastyǵy Álibek Qaıyrov.
Onyń aıtýynsha, tótenshe jaǵdaı engizilgeli atyraýlyq tártip saqshylary qyzmet babynda medıtsınalyq maskamen qamtylǵan.
