Atyraýda tońazytqyshta ólgen sábı: Tergeý jalǵasyp jatyr
ATYRAÝ. QazAqparat – Atyraýda náresteni tońazytqyshqa salyp óltirý faktisi boıynsha tergeý jalǵasyp jatyr. Kúdiktiler qamaýda, dep habarlaıdy QazAqparat tilshisi.
«Qazirgi ýaqytta Atyraý oblysy perınataldyq ortalyǵynyń qyzmetkerleri (jańa týǵan sábıdi tońazytqyshqa salyp óltirýge qatysy bar kúdiktiler – QazAqparat) qamaýda. Sotqa deıingi tergeý jalǵasýda. Jaqyn arada tergeý aıaqtalady. Barlyq saraptamalar, mamandardyń qorytyndysy alyndy. Іs prokýratýra arqyly sotqa jiberiledi», - dep málimdedi QR Sybaılas jemqorlyqqa qarsy is-qımyl agenttigi birinshi departamenti basshysynyń orynbasary Baýyrjan Balǵabekov.
Eske sala keteıik, 2019 jyldyń qyrkúıek aıynyń sońynda Atyraý oblysynda perınataldyq ortalyq basshysy men dárigeri jańa týǵan náresteni tońazytqysh kamerasyna salyp óltirdi degen kúdikke ilingen bolatyn.
Keıin Sybaılas jemqorlyqqa qarsy is-qımyl agenttigi jańa týǵan balany óltirdi degen kúdiktige, Atyraý oblystyq perzenthanasynyń bas dárigerine qatysty, sondaı-aq sybaılas jemqorlyq qylmystaryna qatysty tergeletin qylmystyq istiń barysy týraly aıtty. Senbi kúni Atyraý oblysyna QR Densaýlyq saqtaý vıtse-mınıstri bastaǵan respýblıkalyq densaýlyq saqtaý uıymdarynyń jetekshi mamandary keldi. Olar oblystyq perınataldyq ortalyqtyń dárigerlerine kómek kórsetedi.
Dúısenbi kúni Atyraýdaǵy perınataldyq ortalyqta jumys isteıtin 35 medıtsınalyq qyzmetkerdiń 31-i jumystan bosatylǵany belgili boldy. Sondaı-aq, Atyraý oblysynyń ákimi oblystyq perınataldyq ortalyqtaǵy shaqalaqtyń ólimine qatysty túsinikteme berdi. QR Kásipodaqtar federatsııasy Atyraýdaǵy medqyzmetkerlermen bolǵan jaǵdaıǵa baılanysty pikirin bildirdi.
