Atyraýda tólenbegen aıyppuly bar júrgizýshilerden 30 mln teńge óndirildi

ATYRAÝ. QazAqparat – Atyraýda bir aıda 700-ge jýyq júrgizýshiden tólenbegen 30 mln teńge aıyppul óndirildi, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetine súıensek, 30 mamyr – 30 maýsym aralyǵynda «Boryshker» is-sharasy ótkizilgen.

«Atalǵan is-shara kezinde jol qozǵalysy erejesin buzǵany úshin salynǵan ákimshilik aıyppuldardy óndirip alý kózdeldi. Sol sebepten, polıtsııa qyzmetkerleri jeke sot oryndaýshylarmen, memlekettik kirister organynyń qyzmetkerlerimen birge reıdter ótkizdi. Birlesken reıd kezinde aıyppulyn tólemegen júrgizýshilerdiń 500-ge jýyq avtokóligi QR Ákimshilik quqyq buzýshylyq týraly kodeksiniń 785-babyna sáıkes arnaýly turaqqa qoıyldy. Al 700-ge jýyq kólik quralynyń júrgizýshilerinen 30 mln teńgeden astam tólenbegen aıyppul óndirilip alyndy», - dep habarlady Atyraý qalalyq patrýldik polıtsııa batalonynyń komandıri Dáýren Nasıpolla.

Onyń aıtýynsha, júrgizýshilerge jolda júrý erejesiniń qaǵıdasy túsindirilgen. Jol erejesin buzýshylarǵa 7 kún ishinde aıyppuldyń 50 paıyzyn tóleýge bolatyny jóninde aıtylǵan.

Eske sala ketelik, budan buryn Atyraýda aıyppulyn tólemeı júrgen 134 boryshkerden 2 mln teńge, keıin júrgizýshilerden 16 mln teńge óndirilgenin jazǵan edik.