Atyraýda tok soǵyp kóz jumǵan balanyń ákesi qoıylǵan dıagnozǵa kelispeıtinin bildirdi
ATYRAÝ. QazAqparat – Atyraýda tokqa túsken balanyń ólimine qatysty túsinik berildi, dep habarlaıdy QazAqparat.
Buǵan deıin Atyraýda tokqa túsken 10 jasar balanyń kóz jumǵanyn jazǵan edik.
Oblystyq polıtsııa departamentiniń baspasóz qyzmetinen málim etkendeı, oqys oqıǵa 30 qazanda bolǵan.
Polıtsııaǵa 1953 jylǵy azamatsha saǵat 15:00 shamasynda nemeresiniń tokqa túskeni jóninde habar bergen.
Keıin 10 jasar balanyń oınap júrip, tońazytqyshtyń artyna tyǵylǵany anyqtalǵan.
Sol kezde balany tok soqqan.
Tokqa túsip, kóz jumǵan balanyń ákesi jedel járdem kelgen kezde balanyń tiri bolǵanyn aıtyp, polıtsııaǵa shaǵym bergen.
Ol jedel járdem brıgadasynyń qoıǵan dıagnozymen kelispegen.
«Balanyń anasynan 30 qazan saǵat 14.45-te shaqyrtý tústi. Brıgada shaqyrtý túsken mekenjaıǵa ýaqytynda keldi. Balaǵa «jedel járdem kelgenge deıingi ólim» dıagnozy qoıyldy. Reanımatsııalyq sharalar algorıtm boıynsha kórsetildi. Tergeý júrip jatqan kezde brıgada óz aýysymynda jumys isteıdi», -dep málim etti Atyraý oblystyq jedel járdem stansasynyń baspasóz qyzmetinen.
