Atyraýda tógilip jatqan munaı toqtatyldy
ATYRAÝ. QazAqparat - Atyraý oblysyndaǵy munaı aıdaý stantsııasynda tógilip jatqan munaı toqtatyldy, dep habarlaıdy «QazAqparat» HAA tilshisi.
«2018 jyldyń 15 qańtarynda elektrmen jabdyqtaýshy uıymnyń kerneýdi kúsheıtip jiberýine baılanysty «KazTransOıl» AQ qarasty A.Qultýmıev atyndaǵy Qulsary munaı qubyry basqarmasynda munaı tógildi. 12:42-de apatqa qarsy júıe iske qosyldy. Saldarynan №7 munaı jylytý peshindegi elektr jetegi arqyly jumys isteıtin jyljytpa tolyqtaı ashylyp ketken. Jyljytpanyń ashylýynan munaı drenaj ydyspen qosa jer qabatyna da tógildi. Qazir búlingen jer qabaty tazalanyp, rekýltıvatsııa jumystary júrgizilýde»,-dep habarlaıdy «KazTransOıl» AQ.
Tógilgen munaıdyń kólemi jaıly aqparat anyqtalyp jatyr.
«KazTransOıl» AQ nysandary men múlikteri búlingen joq. Oqıǵa oryn alǵan jer turǵyn úı aýdandarynan alys ornalasqan. Qorshaǵan ortanyń búlinýi jaıly fakti tirkelgen joq»,-dep habarlaıdy baspasóz qyzmeti.
