Atyraýda tóbesi tesik mekteptiń bastaýysh synyp oqýshylary onlaın oqýǵa jiberildi
Atyraý oblysy ákiminiń orynbasary Jasulan Bısembıevtiń málimetinshe, tóbesinen sý aqqan №30 mektep-gımnazııasynyń ǵımaraty 2002 jyly paıdalanýǵa berilgen. Ǵımarattyń shatyrynan 2007 jyldan beri sý aǵady. Mundaı jaǵdaı jaqynda taǵy qaıtalandy. Mektepte 54 kabınet bar. Bul joly shatyrdan aqqan sýdan 40 kabınet jaramsyz bolyp qalǵan.
«Bilim ordasyndaǵy 2075 oqýshylardyń bári onlaın formatta oqýǵa jiberildi. Qazir mekteptiń ǵımaratyn kúrdeli jóndeýdiń jobasy bar. Birinshi kezekte shatyrǵa kúrdeli jóndeý júrgizý qajet. Sol sebepten, qazir shatyrdyń qurylymyn ózgertý jóninde joba pysyqtalyp jatyr. Buǵan biraz ýaqyt qajet», -deıdi Jasulan Bısembıev.
Onyń aıtýynsha, mektep kabınetteri búlingen soń oqýshylardy sabaqtan qaldyrmaý máselesi týyndaǵan. Osyǵan baılanysty bir aptadan beri birneshe nusqa qarastyrylǵan.
«Keıbir ata-analar oqýshylardy qashyqtan oqytýdy saqtaý qajettigi týraly usynys aıtty. Ózge ata-analar balalardy qashyqtyqtan oqytpaýdy talap etti. Barlyq usynysty sekerip, oqý jylynyń sońyna deıin bastaýyshtaǵy 1-4-synyptardyń oqýshylaryn túgeldeı onlaın formatta oqýǵa jiberý týraly sheshim qabyldandy. Al, 5-11-synyptardyń oqýshylaryn mektep-gımnazııaǵa jaqyn ornalasqan eki kolledjdiń bos kabınetterinde oqytý uıymdastyrylady. Joǵary synyptardaǵy oqý sapasyn tómendetpeý úshin osyndaı qadamǵa barýǵa týra keldi», -dep málim etti Jasulan Bısembıev.
Eske sala ketelik, budan buryn Atyraýda ózge mektepke aýysqan oqýshylar sabaqty 35 mınýttan oqıtynyn habarlaǵan edik.
