Atyraýda tóbesi opyrylyp qalǵan mekteptiń oqýshylary qashyqtan oqıtyn boldy

ATYRAÝ. QazAqparat – Atyraýda mektep-gımnazııadaǵy sabaqtyń onlaın formatqa aýystyrylýyna baılanysty túsinik berildi, dep habarlaıdy QazAqparat.

Atyraý qalasyndaǵy №30 mektep-gımnazııada sabaqtyń onlaın formatta ótýine shatyrdaǵy aqaý sebep bolǵan.

«Bul mektep-gımnazııa 2002 jyly paıdalanýǵa berilgen. Oqý ornynyń tehnıkalyq jaǵdaıyn tekserý úshin «Q-Ekspert» JShS-men kelisimshart jasaldy. Atalǵan seriktestiktiń bergen qorytyndysyna sáıkes, mekteptiń shatyrynda kúrdeli jóndeýdi qajet etetin aqaýlar bar. Qazir oqý ornynda «Armstrong» qaptama tóbesi qulap jatyr. Biraq, bul gıps blogy emes. Osy jaǵdaıdy eskere otyryp, tehnıkalyq qorytyndy negizinde jobalyq-smetalyq qujattama daıyndalady. Osyǵan sáıkes shatyrǵa kúrdeli jóndeý júrgizý josparlanyp otyr» - dep habarlady Atyraý qalalyq bilim bóliminen.

Sondaı-aq, bul jaǵdaıdyń oqý protsesine eshqandaı áseri bolmaıtyny, erteń oqýshylardyń ádettegi oqý formatyna kóshetini naqtylanyp jatyr.

Eske sala ketelik, budan buryn Atyraýda jeke turǵyn úıde jylý qazandyǵy jarylǵanyn habarlaǵan edik.