Atyraýda terrorızm týraly jalǵan habar berý boıynsha 5 qylmystyq is qozǵalǵan

ATYRAÝ. QazAqparat – Bıyl Atyraýda terrorızm týraly jalǵan habar bergenderdiń ústinen 5 qylmystyq is qozǵalǵan. Eki is sotqa joldanǵan, dep habarlaıdy QazAqparat tilshisi.

Atyraý qalasynyń prokýrory Arshat Taıtýllınniń málimetine súıensek, jyl basynan beri terrorızm aktisi týraly kórineý jalǵan habar berý deregi boıynsha 5 qylmystyq quqyq buzýshylyq isi tirkelgen.

«Osy kezge deıin eki is boıynsha tergeý aıaqtalyp, sotqa joldandy. Mundaı qylmysty jasaǵandar áreketiniń basty sebebi – kásiporyn nemese mekemeniń jumysyn toqtatý. Tipti, jalpy bilim beretin mektepterde sabaqty boldyrmaýdy kózdeıtinder bar. Al saldary – kásiporyndar shyǵynǵa batady. Kóp jaǵdaıda terrorızm aktisi týraly jalǵan habardy ázil dep oılaıtyn adamdar mundaı teris áreketi úshin jaýapqa tartylatynyn sezine bermeıdi», - deıdi Atyraý qalasynyń prokýrory Arshat Taıtýllın.

Onyń aıtýyna qarǵanda, qalalyq prokýratýranyń pármenimen eki saıt buǵattalǵan. Bul saıttarda úı ishinde jarylǵysh zattardy daıyndaýdy úıretetini anyqtalǵan.

«Turǵyndarǵa terrorızm aktisi týraly kórineý jalǵan habar bergeni úshin eń qatań jaza bar ekenin eskertkim keledi. Jalǵan habar taratýshylarǵa QR qylmystyq kodeksiniń 273-babyna sáıkes 5 jylǵa deıingi merzimge bas bostandyǵynan aıyrý jazasy kózdelgen», - dedi Arshat Taıtýllın.

Eske sala ketelik, buǵan deıin Atyraýda bástesýden utylǵan jasóspirim jalǵan habar bergenin, keıin oqýshy bir aıda polıtsııany 4 márte ótirik aqparatpen shaqyrǵanyn jazǵan edik.