Atyraýda teris dinı aǵymdy ustanatyn shetel azamaty oq-dárini zańsyz saqtaǵan

ATYRAÝ. QazAqparat – Atyraýda teris dinı aǵymdy ustanatyn sheteldik oq-dárini zańsyz saqtaǵan. Sheteldiktiń Ózbekstan Respýblıkasynyń azamaty ekeni anyqtalyp otyr. Kúdikti ýaqytsha ustaý ızolıatoryna qamaýǵa alyndy, dep habarlaıdy QazAqparat tilshisi.

Іshki ister mınıstrliginiń ekstremızmge qarsy is-qımyl departamenti men Atyraý oblystyq polıtsııa departamentiniń ekstremızmge qarsy is-qımyl basqarmasy, UQK Atyraý oblysy boıynsha departamentiniń qyzmetkerleri jedel izdestirý is-sharasyn ótkizý kezinde sheteldik azamatty ustady. Ózbekstan Respýblıkasynyń azamaty zańsyz oq-dári saqtaǵany anyqtaldy.

«Ózbekstan Respýblıkasynyń 1986 jylǵy azamaty Atyraý qalasyndaǵy turǵylyqty meken-jaıynda áskerı maqsatta qoldanylatyn patrondardy zańsyz saqtap kelgen. Zańsyz saqtalǵan oq-dári tárkilendi. Kúdikti retinde 36 jastaǵy ózbekstandyq destrýktıvti dinı aǵymnyń ustanýshysy ekendigi anyqtalyp otyr», - dep habarlady polıtsııa departamentiniń baspasóz qyzmeti.

Qazir atalǵan derek boıynsha QR Qylmystyq kodeksi 287-babynyń 2 bóligimen (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) sotqa deıingi tergep-tekserý júrgizilip, is sotqa joldandy. Kúdikti ýaqytsha ustaý ızolıatoryna qamaýǵa alyndy.

Eske sala ketelik, buǵan deıin Atyraýda esirtki prıtonyn uıymdastyrǵan ózbekstandyq áıel ustalǵanyn jazǵan edik.