Atyraýda tennıs ortalyǵy satylymǵa shyǵaryldy
ATYRAÝ. QazAqparat – Atyraýda 2016 jyldyń sońynda paıdalanýǵa berilgen tennıs ortalyǵy keıin satyp alý quqyǵynsyz senimgerlik basqarýǵa berý úshin satylymǵa shyǵaryldy, dep habarlaıdy QazAqparat tilshisi.
Konkýrstyń sharttary Elektrondy saýda alańynda jarııalandy . Oblystyq qarjy basqarmasynyń aqparatyna sáıkes, nysandy qoǵam ıgiligi úshin oblys aýmaǵynda tennıs sportyn damytý jáne osy sport túrimen shuǵyldanatyndardyń onyń ishinde, jergilikti balalar men jasóspirimderdiń, jastardyń sanyn arttyrý maqsatynda paıdalaný kerek.
«Nysannyń jalpy aýmaǵy – 4 887,5 sharshy metr, jer ýchaskesi – 2,1 myń gektar, 156 túrli 817 múlki bar. Bastapqy balans quny – 1 514 565 725,37 teńge», delingen aqparatta.
Tennıs ortalyǵyn senimgerlik basqarýǵa alatyn ıesi 30 shildede anyqtalady. Qazir qujat qabyldaý júrip jatyr.
