Atyraýda temirjol vokzalyn keńeıtý josparlanyp otyr
ATYRAÝ. QazAqparat – Atyraýda temir jol vokzalyn keńeıtý josparlanyp otyr, dep habarlaıdy QazAqparat.
Atyraý qalalyq ákimdigi baspasóz qyzmetiniń málimetinshe, jańa baǵyttarǵa júrdek poıyzdardyń qatynaýymen jolaýshylar sany artqan. Sol sebepten, temir jol vokzalyn janyndaǵy avtobeketpen biriktirý kózdelip otyr.
1972 jyly salynǵan vokzaldyń syıymdylyǵy 500 adamǵa eseptelgen. Qazir kelýshiler sany 6 esege artyp, 3000-ǵa jetken. Jol júrý baǵyty da kóbeıgen. Máselen, stýdentter Almaty men Nur-Sultanǵa, Mańǵystaý men Aqtóbege kóp qatynaıdy. Sondaıa-aq tipti, Jylyoı aýdanyndaǵy kásiporyndarda vahtalyq ádispen jumys isteıtin jumysshylar da osy vokzaldan jolǵa shyǵady.
«Jolaýshylar aǵynyń kóbeıýine baılanysty vokzaldy keńeıtý josparlanyp otyr. Osyǵan oraı qasyndaǵy avtobeketti vokzalǵa qosyp, aýmaǵyn keńeıtýge bolady. Bul jospar avtobeketti «Qazaqstan temir joly» UK» AQ balansyna alǵannan keıin ǵana júzege asyrylady. Qazir avtobeketti balansqa alý jumysy júrgizilip jatyr. Muny óte tıimdi joba dep esepteımiz», - deıdi «Atyraý magıstraldi jeli» bólimshesiniń dırektory Elýbaı Saparov.
Onyń aıtýynsha, aldaǵy ýaqytta oblys ákiminiń bastamasymen «Qazaqstan temir joly» AQ-nyń qoldaýymen «Atyraý-Qurmanǵazy» baǵytyna qatynaıtyn júrdek poıyz iske qosylmaq. Bul da vokzalǵa kelýshilerdiń sanyn arttyrmaq.
«Vokzal aýmaǵyn keńeıtý jospary iske asatyn bolsa, oblysaralyq avtobýstar úshin avtobeketti basqa jerge aýystyrý máselesi qarastyrylatyn bolady. Biz ony Atyraý qalasy mańyndaǵy «Alaman» bazaryna kóshirýdi oılastyryp otyrmyz. Ázirge naqty sheshim qabyldanǵan joq», - «Smart Atyraý» KMM dırektorynyń orynbasary Rústem Ernııazov.
