Atyraýda tegershik jóndeý ortalyǵynda turǵan eki kólik órtenip ketti
Oblystyq tótenshe jaǵdaılar departamenti qoǵammen baılanys tobynyń málimetine súıensek, órt búgin, 3 qarashada tutanǵan.
«Jergilikti ýaqytpen saǵat 12:12-de Atyraý qalasyndaǵy S. Beıbarys dańǵylynyń №99 mekenjaıynda ornalasqan tegershik jóndeý ortalyǵynyń aldynda «Gazelle Neht» markaly júk kóligi órtendi. Órt sóndirýshiler oqıǵa ornyna jetkende «Mercedes» avtokóliginiń de órtenip jatqany anyqtaldy. Jalyndy sóndirýge oblystyq tótenshe jaǵdaılar departamentiniń jeke quramynan 5 qyzmetker men 1 tehnıka jumyldyryldy. Órt saǵat 12:30-da tolyqtaı sóndirildi», - dep habarlady departamenttiń qoǵammen baılanys toby.
Qazir órttiń shyǵý sebebin anyqtaý bastaldy. Órttiń saldarynan zardap shekkender adamdar men qaza bolǵandar joq.
«Byltyr avtokólikterge qatysty 79 órt oqıǵasy tirkelgen bolatyn. Onyń ishinde 53 jeńil, 21 júk, 2 avtobýs, 2 aýyl sharýashylyǵy tehnıkasy, 1 júzý kóligi órtendi. Al, bıylǵy jyl basynan beri osyndaı 66 órt tirkelip otyr. Jalyn 34 jeńil, 29 júk, 2 aýyl sharýashylyǵy tehnıkasy men 1 júzbeli kólikti sharpydy. Osyǵan baılanysty júrgizýshilerge órt qaýipsizdigi erejelerin qatań saqtaýdy, avtokólikte órt sóndirgish quralyn bolýy tıis ekenin eskertemiz», - dep málim etti qoǵammen baılanys tobynan.
Eske sala ketelik, buǵan deıin Atyraý oblysynda KamAZ ben 840 tonna mal azyǵy órtenip ketkenin jazǵan bolatynbyz.
