Atyraýda Taýman Amandosov atyndaǵy syılyqtyń ıegerleri anyqtaldy
Syılyq ıegerlerin oblys ákimi Mahambet Dosmuhambetov marapattady. Jeńimpazdarǵa berilgen qarjylaı syıaqy mólsheri – 500 myń teńge.
«Qaı kezde de aqparat salasynyń mamandary – qoǵamnyń aınasy. Pandemııa ýshyǵyp turǵan kezde dárigerlermen birge, jýrnalıster de aldyńǵy shepte júrdi. Qaýipti aımaqtan tikeleı reportajdar júrgizip, shynaıy aqparatty taratty. Bul – BAQ ókilderiniń kásibine adaldyǵynyń kórinisi», - dedi Mahambet Dosmuhambetov.
Arnaıy qurylǵan qazylar alqasynyń sheshimimen «Úzdik jýrnalıst–2020» nomınatsııasyn belgili jýrnalıst, «Saraıshyq» jýrnalynyń bas redaktory Isataı Balmaǵambetov ıelendi.
«Atameken» UKP Atyraý oblysy boıynsha fılıalynyń baspasóz hatshysy Ásel Tuıaqpaeva – «Úzdik baspasóz qyzmeti–2020», volonter ári bloger Qýat Janeseev – «Úzdik bloger–2020», óńirlik kommýnıkatsııalar qyzmetiniń dızaıneri Elaman Nýhın «Úzdik vızýaldy jumys–2020» nomınatsııasymen marapattaldy.
Al, «Úzdik kreatıvti shyǵarmashylyq–2020» nomınatsııasyn jýrnalıst Nurbergen Maqym, «KTK» arnasynyń Atyraý oblysyndaǵy menshikti tilshisi Beken Álırahym «Úzdik menshikti tilshi–2020», «Atyraý–Aqparat» JShS baspahanasynyń túpteý tsehynyń túpteýshisi Altynaı Tantýarova «Úzdik tehnıkalyq maman–2020» atalymyn ıelendi.
Sondaı-aq, «Úzdik kadr–2020» nomınatsııasy «Atyraý» telearnasynyń operatory Qanat Eleýovke, «Úzdik ınternet pablık–2020» atalymy Faceebok paraqshasy úshin bloger Arman Haırýlınge, «Úzdik redaktsııa–2020» atalymy Qurmanǵazy aýdandyq «Serper» gazetine berildi.
Óńirdiń bir top jýrnalısine 1 mıllıon teńgelik «Turǵyn úı» sertıfıkaty tapsyryldy.
