Atyraýda táýelsizdiktiń otyz jylynda ómir súrý uzaqtyǵy 65-ten 70 jasqa deıin uzardy

ATYRAÝ. QazAqparat – Atyraý oblysynda elimiz táýelsizdigin alǵan 1991 jyly 11 600 sábı ómirge kelgen, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetiniń málimetinshe, 1991 jyldan beri turǵyndardyń tabıǵı ósimi jaqsarǵan.

«Elimiz táýelsizdik alǵannan bergi 1991-2021 jyldar aralyǵynda óńir turǵyndarynyń sany 432,9 myńnan 657 110 myń adamǵa jetti. Al, ortasha ómir súrý uzaqtyǵy 65,9-dan 70,52 jasqa deıin ulǵaıdy. Sondaı-aq, 1000 adamǵa shaqqandaǵy týý koeffıtsıenti 26,80-den 27,19-ǵa deıin ósti. Ólim-jitim koeffıtsıenti 1000 adamǵa shaqqanda 8,0-den 7,17-ge deıin tómendedi. Turǵyndardyń tabıǵı ósim koeffıtsıenti 1000 adamǵa shaqqanda 18,80-den 20,02-ge deıin jetip otyr», -dep habarlady basqarmanyń baspasóz qyzmeti.

Atyraý oblystyq perınataldyq ortalyǵy dırektorynyń mindetin atqarýshy Qazbek Ermaǵambetovtiń aıtýynsha, táýelsizdiktiń eleń-alańyndaǵy ekonomıkalyq qıyndyq bala týý kórsetkishine áser etken.

«Alaıda, elimizde bosandyrý, ana men bala kútimin jaqsartý maqsatynda memlekettik baǵdarlamalardy iske asyrý qolǵa alyndy. Sonyń nátıjesinde oblysta 1000 adamǵa shaqqanda jyl saıyn 28-29 myń sábı ómirge keledi. Máselen, 1991 jyly 11 600 bala jaryq dúnıe esigin ashty. Al, 2020 jyly 17,7 myń náreste týdy. Bala týý koeffıtsıentin eń joǵary kórsetkishtiń biri deýge bolady», -deıdi Qazbek Ermaǵambetov.

Eske sala ketelik, budan buryn Atyraý oblysynda bıylǵy 10 aıda 418 sábı shala týǵanyn habarlaǵan edik.