Atyraýda Táýelsizdik kúni qarsańynda jańa mektep paıdalanýǵa berildi

ATYRAÝ. Atyraý qalasynda Táýelsizdik kúni qarsańynda Samal yqshamaýdanyndaǵy 600 oryndyq jańa mektep paıdalanýǵa berildi, dep habarlaıdy Atyraý oblystyq kommýnıkatsııalar qyzmeti.

Atyraý oblysynyń ákimi Mahambet Dosmuhambetov Atyraý qalasyndaǵy jańadan paıdalanýǵa berilgen jalpy bilim beretin №29 orta mekteptiń lentasyn qıyp, Táýelsizdik merekesimen quttyqtady.

«Elimizdiń bas merekesi qarsańynda qalamyz taǵy bir bilim berý oshaǵymen tolyqty. Budan bylaı 831 bala zamanaýı talapqa saı boı túzegen osy jańa mektepte bilim alady. Olar buǵan deıin qaladaǵy basqa mektepterde oqyp kelgen bolatyn. Táýelsizdik jyldary bilim berý salasyna aıryqsha kóńil bólindi. Óıtkeni, qýatty memleket qurý úshin bilimdi urpaq tárbıeleý kerek ekeni sózsiz. Sondyqtan pedagogtardyń mártebesi kótirilip, jalaqysy jylda artýda. Bilim berý uıymdarynyń materıaldyq-tehnıkalyq bazasy da turaqty túrde jańartylýda. Oblysymyzda bilim berý salasyn damytýǵa basa mán beriledi»,- dedi óńir basshysy Mahambet Dosmuhambetov.

Onyń sózinshe, 1991 jyldan beri tek Atyraý qalasynyń ózinde 23 mektep salynǵan. Bıyl kún sanap ósip kele jatqan qalada 2 mektep el ıgiligine berilgen. Al 5 mektepte kúrdeli jóndeý jumystary jasalyp, úsheýinde aıaqtaldy.

Oblys basshysy «Bereke» yqsham aýdanynda 1200 oryndyq, al Damby aýylynda 300 oryndyq jańa mektep salynyp jatqanyn da atap ótti. «Keler jyly Jańatalap aýylynda 300 oryndyq, «Balaýsa» yqsham aýdanynda 600 oryndyq, Aqjar-2 aýylyndaǵy 600 oryndyq mektep paıdalanýǵa beriledi. Qala mektepterindegi oryn tapshylyǵyn sheshý úshin birqatar jumystar jasalýda. Atap aıtqanda, 4 mekteptiń janynan qosymsha 120 oryndyq japsarjaı salyndy»,-dedi.

Al, ǵımaraty apatty jaǵdaıdaǵy №1 M.Jumabaev atyndaǵy orta mektep ornyna aldaǵy ýaqytta 160 oryndyq jańa ǵımarat salý josparlanýda eken. Oblys basshysy Mahambet Dosmsuhambetov «Munyń barlyǵy Táýelsizdiktiń tiregi — jas býynnyń sapaly bilim alýy úshin jasalǵan jaǵdaılar. Óıtkeni, sapaly bilim ǵana sanaly urpaqtyń qalyptasýyna yqpal etedi. Osy maqsatta Nazarbaev zııatkerlik mektebimen birlese otyryp arnaıy jol kartasyn daıyndap jatqanymyzdy aıta ketkim keledi» - dedi.

Úsh qabatty mektep ǵımaratynda 200 oryndyq akt zaly men 130 orynǵa arnalǵan ashana, jańa úlgidegi psıhologııa kabıneti men medıtsınalyq pýnktter bar. Sý jańa bilim oshaǵy zamanaýı qural-jabdyqtarmen qamtamasyz etilgen.