Atyraýda Táýelsizdik kúni qarsańynda 200 oryndyq jataqhana ashyldy
Jańa jataqhana Atyraý joǵary medıtsınalyq kolledjiniń stýdentteri úshin arnalyp salynǵan.
Bul kolledj 74 jyldan kishi býyn medıtsına qyzmetkerlerin daıarlap keledi. Qazir kolledjde 1 365 stýdent bilim alady.
Onyń ishinde 800-den astamy – aýyldan kelgen jastar.
«Jataqhana Elbasy N.Nazarbaevtyń «Bes áleýmettik bastama» atty halyqqa úndeýi men Memleket basshysy Q.Toqaevtyń «Jastar jyly» sheńberinde jastardy qoldaý is-sharalaryn júzege asyrý týraly Úkimetke bergen tapsyrmasy aıasynda salyndy. Memleket basshysy Qasym-Jomart Toqaev bıylǵy Joldaýynda «Vırýspen kúres kezinde dál osy sala elimizdiń básekege qabileti men qaýipsizdigi úshin mańyzdy ekenine kózimiz jetti», - dep, atap kórsetken edi. Óıtkeni, basty mindet – halyq saýlyǵyn qorǵaý jáne sapaly medıtsınalyq qyzmet kórsetý. Osyǵan oraı óńir medıtsınasyn damytý maqsatynda júıeli jumystar júrgizilip jatyr. Táýelszidiktiń 30 jylynda 65 densaýlyq saqtaý ǵımaraty qoldanysqa berildi. Qazir oblystaǵy medıtsınalyq tehnıkamen jabdyqtalý kórsetkishi 91%-ti quraıdy», -dedi oblys ákimi Mahambet Dosmuhambetov.
Ákimniń aıtýynsha, medıtsına qyzmetkerleriniń jetispeýshiligin joıý úshin jyl saıyn oblys ákiminiń granty bólinip, jas mamandarǵa áleýmettik qoldaý turaqty túrde kórsetilip keledi.
Máselen, 2017 jyldan beri dáriger kadrlardy daıyndaýǵa oblys ákiminiń 335 granty bólingen.
Sońǵy úsh jylda medıtsına qyzmetkerlerine 89 páter berilgen.
Kópbeıindi joǵary kolledj jataqhanasy zamanaýı qural-jabdyqtarmen qamtylǵan.
Munda em qabyldaý, oqshaýlaý, alǵashqy medıtsınalyq kómek kórsetý, ózin-ózi daıyndaý bólmeleri, sondaı-aq, basseın, fıtnes, oqý, májilis zaldary, ashana bar.
Jataqhananyń ár qabatynda demalý, kir jýý bólmeleri qarastyrylǵan.
Eske sala ketelik, buǵan deıin Táýelsizdik jyldarynda Atyraý oblysynda 12 mln sharshy metr turǵyn úı paıdalanýǵa berilgenin habarlaǵan edik.
