Atyraýda «tátti» kitaptar kórmesi ótti
ATYRAÝ. QazAqparat - Atyraýda «tátti» kitaptar kórmesi ótti, dep habarlaıdy QazAqparat tilshisi.
Nazarbaev Zııatkerlik mektebinde ótken «tátti» kitaptar kórmesi qalyń oqyrmannyń kitapqa degen qyzyǵýshylyǵyn oıatýǵa arnalǵan «Kitap-Fest» jobasy aıasynda uıymdastyryldy. Joba sheńberinde atalmysh oqý ornynyń «Shańyraq» oqýshylar qaýymdastyǵynyń múshelerine, ata-analar men ustazdarǵa 16 ádebıetti bir aıda oqyp shyǵý usynylǵan bolatyn.
«Olar áýeli berilgen kitapty otbasynda jáne mektepte úzilis kezinde oqydy. Árbir kitaptyń mazmundylyǵy men qalyń bolýyna baılanysty festıvaldi bir aıǵa sozýǵa týra keldi», - deıdi uıymdastyrýshylar.
Ozyq oqyrmandar mádenıetin damytýǵa arnalǵan «Kitap-Fest» festıvali birneshe kezeńdi qamtydy. Áýeli, Nazarbaev Zııatkerlik mektebiniń oqýshylary tárbıe men oqytý, bala men ata-ana arasyndaǵy qarym-qatynasty arttyrýǵa arnalǵan úzdik ádebıetterdi ózderi oqyǵan soń, olardy qala turǵyndaryna nasıhattady. «Kitap qalany aralaıdy» aktsııasy aıasynda «Shańyraq» qaýymdastyǵynyń músheleri qala kóshelerinde, qoǵamdyq kólikterde, túrli jekemenshik jáne memlekettik uıymdarǵa baryp, kitap týraly aıtyp berdi. Tańdaýly shyǵarmalardyń basym kópshiligi balamen baılanys ornatý, jasóspirimder psıhologııasyndaǵy kúızelisterdiń aldyn alý, ata-ananyń qoǵamdaǵy róli máselelerine arnalǵan. Olardyń arasynda Sanjar Kerimbaıdyń «Ómirge ǵashyq bolý», Olga Gromovanyń «Sheker bala», Stıven Kovıdiń «Otbasy turaqtylyǵynyń jeti qaǵıdasy» týyndylary bar.
Aqpan aıynyń basynda bastaý alǵan joba óz máresine jetti. Osyǵan oraı mektep oqýshylary kitaptar formasynda torttar pisirip, kórme uıymdastyrdy. Torttardyń biri kitap muqabasy retinde bezendirilse, biriniń betine naqyl sózder jazylǵan. Kórmege sondaı -aq oqýshylardyń qolymen jasalǵan túrli buıymdar, turmystyq zattar qoıyldy. 
«Árıne, basty maqsat osyndaı kórme jasap, tańǵaldyrý emes. Kerisinshe, oqýshylar men ata-analardyń kitap oqýǵa degen qyzyǵýshylyǵyn arttyrýdyń tyń formaty desek durys bolady. Sebebi, bul kitaptardy balalar men ata-analar ózderi oqyp shyqty. Sáıkesinshe, jasalǵan kádesyılar, jármeńkede usynylyp otyrǵan taýarlardyń barlyǵy belgili bir kitaptyń mazmunyn sıpattaıdy», - dedi mekteptiń baspasóz hatshysy Ánýar Jamanqulov.
