Atyraýda tártip saqtaýǵa 150-den astam polıtseı jetispeıdi
ATYRAÝ. QazAqparat - Qazirgi tańda Atyraý oblystyq ІІD-niń shtattyq birliginde 151 polıtsııa jetispeıdi, dep habarlaıdy QazAqparat.
«Bizde kadr jetispeýshiligine qatysty másele barynsha ózekti. Búgingi tańda ІІD-ge jergilikti polıtsııa qyzmetinde isteýge 151 qyzmetker qajet. Onyń 79-y - patrýldik qyzmet úshin, bul patrýldik qyzmettiń 25 ekıpajy. Sondyqtan túnde patrýldeýge 22 ekıpaj jetispeıdi. Sondaı-aq byltyr óńirde ishki ister organdarynan óz ótinishimen 45 qyzmetker jumystan ketti», - dep málim etti Atyraý oblystyq ІІD basshysy Aıan Dúısenbaev.
Ol kópshiliktiń nelikten polıtsııaǵa jumysqa turýdan qashatyn sebepterin aıtty.
«Qyzmetke keletinderdiń kóbisi tómen jalaqyǵa kóńilderi tolmaıdy, bul - aıyna 80 myń teńge shamasynda, sonymen birge baspanamen qamtylý qarastyrylmaǵan. Bıyl biz ákimdikten qyzmetkerlerimizge 200 páter alamyz degen úmitimiz bar. Buǵan qatysty qalalyq ákimdikpen kelisim jasalǵan», - dedi A. Dúısenbaev.
