Atyraýda tarıhı-mádenı nysandardaǵy QR-kodta 5 tilde aqparat engizilgen

ATYRAÝ. QazAqparat – Atyraýda tarıhı-mádenı nysandarǵa QR-kod ornatylyp jatyr. Endi QR-kodpen ár nysan týraly bes tilde aqparat alýǵa bolady, dep habarlaıdy QazAqparat.

Oblystyq kásipkerlik jáne týrızm basqarmasynyń basshysy Nurbol Jańabekovtiń málimetine súıensek, Atyraý oblysynda 4 respýblıkalyq, 313 jergilikti mańyzǵa ıe eskertkish bar.

Al, Qazaqstannyń kıeli jerleriniń tizimine engen 7 tarıhı eskertkish bar. Bular – Mahambet aýdanyndaǵy «Saraıshyq» tarıhı-memorıaldyq kesheni, Jylyoı aýdanynda ornalasqan Aqmeshit qorymy, Qulshan ata jerasty meshiti, Araltóbe qorǵany, Imanqara kesheni, Ushqan ata qorymy, Inder aýdanynyń Qaroı jazyǵyndaǵy Mahambet Ótemisulynyń mazary.

«Bıyl týrızm salasyna tsıfrlandyrýdy engizý maqsatynda 6 eskertkishke QR-kod ornatyldy. Sondaı nysandardyń qatarynda Saraıshyq qalashyǵy, Saraıshyq mýzeı qoryǵy, qazaqtyń kúı anasy atanǵan Dına Nurpeıisova, áskerı ushqysh, Halyq Qaharmany Hıýaz Dospanova, Ánuran avtory, Memlekettik syılyqtyń ıegeri, aqyn Jumeken Nájimedenov, qıyn kezde óńir turǵyndary azyq retinde qoldanǵan Qumarshyq eskertkishi bar. Endi kez kelgen adam, onyń ishinde óńirge saıahattap kelgen týrıster QR-kod arqyly atalǵan eskertkishter týraly 5 tilde aqparatty alýyna bolady», -deıdi Nurbol Jańabekov.

Onyń aıtýynsha, eskertkishterdi 3D kórinisin tamashalaýǵa bolady. Bul úshin «Tarihi jol» qosymshasyn júkteý qajet. QR-kod-ta eskertkishterdiń qaı jyly ornatylǵany, tarıhy týraly tolyq aqparat bar.

Eske sala ketelik, buǵan deıin Atyraýda týrızm salasynda 10,8 mlrd teńgeniń 9 ınvestıtsııalyq jobasy iske asyrylatynyn habarlaǵan bolatynbyz.