Atyraýda taksı júrgizýshilerinen aqsha bopsalaǵandar ustaldy
ATYRAÝ. QazAqparat - Atyraý qalasynda halyqaralyq tasymalmen aınalysqan taksı júrgizýshilerden aqsha bopsalaǵan qylmystyq top múshelerine qatysty sot úkimi shyqty, dep habarlaıdy «QazAqparat» HAA.
«Tergeý barysynda anyqtalǵandaı, atyraýlyq alty azamat 2014-2017 jyldar aralyǵynda Atyraýdyń temirjol vokzalynan «Atyraý-Astrahan», «Atyraý-Oral» jáne «Atyraý-Beıneý» baǵdarymen jolaýshylardy tasymaldap júrgen taksı júrgizýshilerden aqsha bopsalaǵan. Sottalýshylar olardan áýeli jolaýshylar tasymalymen aınalysý úshin 80 myńnan 200 myńǵa deıin aqsha tóleýin talap etken. Bul somany bergen júrgizýshi keıin aı saıyn 5 myńnan 25 myńǵa deıin tólep turýy tıis bolǵan», - dep habarlady Atyraý oblysy qylmystyq ister boıynsha mamandandyrylǵan sottyń baspasóz qyzmetinen.
Sot otyrysynda sottalýshylar óz kinásin moıyndap, jábirlenýshilerge keltirgen zııandy tolyq ótedi.
«Kinásin moıyndaýdan bólek, sottalýshylardyń qylmys jasaǵany jedel-izdeý sharalarynyń qorytyndylary, jábirlenýshiler, kýágerlerdiń túsinikteme berýi, telefon arqyly sóılesý stenogrammasy, saraptama qorytyndylary jáne taǵy basqa materıaldar arqyly tolyq dáleldengen.
«Sot úkimi boıynsha qylmystyq topty uıymdastyrǵan azamatqa 7 jyl 6 aı bas bostandyǵynan aıyrý, uıymdasqan qylmystyq toptyń taǵy eki múshesine 7 jyl bas bostandyǵynan aıyrý jazasy taǵaıyndaldy. Taǵy úsh qylmysker úsh jylǵa sottaldy», - dep habarlady Atyraý oblysy qylmystyq ister boıynsha mamandandyrylǵan sottyń baspasóz qyzmetinen.
