Atyraýda taǵy da jaǵymsyz ıis baıqalyp tur
Osyǵan oraı oblys ákiminiń orynbasary Jasulan Bısembıev túsinik berdi.
«Sońǵy kúnderi qalada kúlimsi ıis taralyp jatyr. Iistiń jaıylý sebebin anyqtaý maqsatynda qorshaǵan ortany qorǵaýǵa jaýapty memlekettik organǵa shuǵyl áreket etý tapsyryldy. Mamandardyń paıymdaýynsha, soltústik baǵyttan jel soqqanda «Kvadrat» býlaný alańynyń ıisi qalaǵa keledi. Al, «Kvadratta» ıistiń jaıylý sebebi ony tazalaý jumystarymen baılanysty bolyp otyr. Qazirgi ýaqytta ákimdiktiń tapsyrysymen «Kvadratty» tazalaý, jańa kárizdik tazartý qondyrǵysyn salý jumystary júrgizilýde». –dep habarlady Jasulan Bısembıev.
Atyraý qalasynyń oń jaǵalaýyndaǵy bul jobany «Pavlodar ózen porty» kompanııasy byltyrǵy tamyzdan beri qolǵa alǵan. Joba jetekshisi Rınat Saımovtyń aıtýynsha, osy kezge deıin eki tundyrǵysh bógeti salynǵan.
«Jalpy kólemi 1 700 000 tekshe metr tunbanyń 500 myń tekshe metri aıdaldy. Arnaıy snarıadpen toǵandaǵy negizgi tundyrǵyshtan laı sý qospasy basqa tundyrǵyshqa jiberiledi. Onda laı sý qospasy tunǵannan keıin qamyspen tazartylyp, bıoplataǵa aǵady. Tazalaý tabıǵı túrde júrgiziledi. Sodan keıin sý negizgi tundyrǵyshqa jiberiledi», -dep túsindirdi Rınat Saımov.
Mamannyń aıtýynsha, 4 snarıad, 2 ekskavator, 60 adam tartylǵan. Qazir 402 shaqyrymǵa 710 mm kollektor jelisiniń turbasyn, rezervýarlar salý jumystary júrip jatyr. Jobaǵa 480 myń tekshe metr topyraq paıdalanylady. Qazir 100 myń tekshe metr topyraq jetkizilgen.
«Toǵannyń aınalasynda jasyl beldeý jasalady. Bul úshin qunarlandyrylǵan topyraq tóseledi. Bul aýmaq qorshalyp, kóshetter egiledi», -deıdi Rınat Saımov.
