Atyraýda taǵy bir jolaýshylar avtobýsy janyp ketti
ATYRAÝ. QazAqparat – Atyraý qalasynda taǵy bir jolaýshylar avtobýsy janyp ketti, dep habarlaıdy QazAqparat.
Buǵan deıin Atyraýda jolaýshy tasymaldaıtyn avtobýs otqa oranǵanyn jazǵan bolatynbyz.
Oblystyq tótenshe jaǵdaılar departamentiniń baspasóz qyzmetinen málim etkendeı, keshe, 22 qarasha kúni saǵat 17:30-da avtobýstyń órtengeni týraly habar túsken.
«Atyraý qalasynyń «Juldyz» shaǵyn aýdanyndaǵy Aıýpov kóshesinde ornalasqan jeke turǵyn úıdiń janynda avtobýstan órt shyqqan. Oqıǵa ornyna jetken órt sóndirýshiler «Setra» markaly jolaýshylar avtobýsynyń tolyqtaı janyp ketkenin anyqtady. Jalyn saǵat 17:54-te aýyzdyqtalyp, saǵat 17:59-da sóndirildi. Oǵan departamenttiń 6 qyzmetkeri men 2 kólik jumyldyryldy» -dep málim etti departamenttiń baspasóz qyzmetinen.
Órtten qaza bolǵandar men zardap shekkender joq. Jalyn kóliktegi elektr symdarynyń qysqa tuıyqtalýy saldarynan tutanǵan.
