Atyraýda taǵy bir jigit iship alyp, kópirden sekirýge oqtaldy

ATYRAÝ. QazAqparat – Atyraýda tún ortasynda taǵy bir ishimdik ishken jigit kópirden sekirýge oqtaldy. Ony polıtsııa qyzmetkeri raıynan qaıtardy, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, oqıǵa týraly derek búgin túnde, 25 tamyz saǵat 1:30 shamasynda tirkelgen.

Atyraý qalasyndaǵy «Jumysker» jáne «Balyqshy» shaǵyn aýdanyn jalǵastyryp, Jaıyq ózeniniń ústinen ótetin kópirden er adam sekirýge oqtalǵan. Bul týraly málimet alǵan patrýldik polıtsııa batalonynyń vzvod komandıri, polıtsııa aǵa leıtenanty Aslanbek Ǵarıfýllın jedel jetken.

Polıtsııa ınspektory óz-ózine qol jumsamaq nıette turǵan jigitpen profılaktıkalyq kelissóz júrgizgen. Ol tártip saqshysyna óziniń ekinshi top múgedegi ekenin, otbasyna aqsha jetkize almaǵanyna nalıtynyn aıtqan. Sol sebepten, kópirden sekirmek bolǵan.

«Sýıtsıd jasaǵaly turǵan er adammen kelissóz sátti aıaqtaldy. Polıtsııa er adamnyń Atyraý qalasynyń turǵyny ekenin anyqtady. Onyń jasy – 35-te. Medıtsınalyq saraptamanyń qorytyndysymen, jeńil dárejeli masań kúıde ekeni dáleldendi. Ol Atyraý qalasyndaǵy №1 polıtsııa bóliminiń jedel-tergeý bólimine tapsyryldy», - dep habarlady departamenttiń baspasóz qyzmetinen.

Eske sala ketelik, budan buryn da Atyraýda iship alǵan er adam tún ortasynda kópirden sekirmek bolǵanyn habarlaǵan edik.