Atyraýda taǵy 1,5 gektar qamys órtenip, turǵyn úıdi sharpydy
Oblystyq tótenshe jaǵdaılar departamenti qoǵammen baılanys tobynyń málimetinshe, qamys órti keshe, 23 naýryzda bolǵan.
«Atyraý qalasyndaǵy Shákirov kóshesi tusynda Peretaska kanalynyń jaǵalaýy órtendi. Bul týraly jergilikti ýaqytpen saǵat 12:51-de shaqyrtý tústi. Kanal boıyndaǵy qamys órti sol mańdaǵy saıajaı ýchaskelerin sharpydy. Órttiń saldarynan 1 jazǵy turǵyn úı men aýlasyndaǵy sharýashylyq saraı, taýyq qora, jylyjaı bólikteri búlindi. Kanal jaǵalaýynda jalyn sharpyǵan qamystyń aýmaǵy – 1,5 gektar», - dep habarlady departamenttiń qoǵammen baılanys toby.
Qamys órti saǵat 15:04-te oqshaýlanyp, saǵat 15:37-de tolyq sóndirildi. Órtten zardap shekkender men qaza tapqandar joq.
«Aldyn ala boljamǵa sáıkes saıajaı ýchaskesinde qoqysty jaǵý kezinde órt qaýipsizdigi erejeleri saqtalmaǵan. Sonyń saldarynan órt tutanǵan», - dep málim etti departamenttiń qoǵammen baılanys toby.
Jalyndy sóndirýge 53 qyzmetker men 12 tehnıka jumyldyrylǵan.
Eske sala ketelik, buǵan deıin Atyraýda kanal jaǵasyndaǵy 3 gektar aýmaqta qamys órtengenin habarlaǵan bolatynbyz.
«Atyraý qalasynyń mańyndaǵy Novokırpıchnyı eldi mekeninde ornalasqan kanaldyń jaǵasynda qamys órtendi. Jalyndy sóndirýge órt sóndirý jáne avarııalyq-qutqarý jedel qyzmetiniń 9 qyzmetkeri men 3 arnaıy tehnıka tartyldy. Órt sóndirýshiler oqıǵa ornyna jetken kezde «Ataqonys» sharýa qojalyǵynyń aýmaǵynda dalalyq shóptiń janyp jatqany anyqtaldy. Qamys órti 3 gektar aýmaqqa jaıylǵan», - dep habarlaǵan edi departamenttiń qoǵammen baılanys toby.
