Atyraýda taekvondodan Azııa chempıonaty bastaldy
QR Ulttyq olımpıadalyq komıtetinen málim etkendeı, reıtıngilik týrnırge 15 memleketten 400-ge jýyq sportshy jınalǵan.
Hıýaz Dospanova atyndaǵy muz saraıynda ótip jatqan doda úsh kúnge sozylady.
Chempıonattyń ashylý saltanatynda Qazaqstandaǵy Ońtústik Koreıa elshisi Kım De Sık, Azııa taekvondo odaǵynyń prezıdenti Kıý Seok Lı, QR UOK bas hatshysynyń orynbasary, Sporttyq jekpe-jek jáne kúsh qoldanylatyn sport túrleri konfederatsııasynyń bas dırektory Eldos Ramazanov jáne Atyraý oblysynyń ákimi Nurlan Noǵaev qatysty.
«Bul meniń Atyraýǵa ekinshi ret kelýim. Taekvondonyń damýyna Qazaqstannyń qosar úlesi zor ekenine senimdimin. Uıymdastyrýshylarǵa zor alǵys aıta otyryp, Qazaqstan sportshylary Azııa oıyndarynda sátti óner kórsetkenin atap ótkim keledi», - dedi Qazaqstandaǵy Ońtústik Koreıa elshisi Kım De Sık.
QR UOK bas hatshysynyń orynbasary, sporttyq jekpe-jek jáne kúsh qoldanylatyn sport túrleri Konfederatsııasynyń bas dırektory Eldos Ramazanov mundaı iri jarysty ótkizýdi Qazaqstanǵa senip tapsyrǵany úshin Azııa taekvondo odaǵynyń basshylyǵyna alǵys bildirdi.
«Jazǵy Azııa oıyndarynda bizdiń sportshylarymyz jaqsy nátıje kórsetti. Búgingi chempıonat qatysýshylarynyń barlyǵyna sáttilik tileımin», - degen Eldos Ramazanov, aımaqtaǵy sporttyń damýyna zor úles qosqan Atyraý oblysynyń ákimi Nurlan Noǵaevty da erekshe atap ótti.
Eske sala keteıik, byltyr Atyraýda taekvondodan tuńǵysh ret jastar arasyndaǵy Azııa chempıonaty ótken bolatyn. Atalǵan synǵa 26 memleketten 500-ge jýyq sportshy qatysty.
Jastar arasyndaǵy birinshilikti joǵary deńgeıde ótkizgeni úshin Atyraý qalasy eresekter arasyndaǵy chempıonatty qabyldap otyr.
