Atyraýda taekvondodan alǵashqy Azııa chempıonaty ótedi
ATYRAÝ. QazAqparat - Atyraýda taekvondodan eresekter arasynda ótetin Azııa qurlyǵyndaǵy alǵashqy ashyq chempıonatqa 15 eldiń sportshylary qatysýǵa ótinish bildirgen, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
7-9 qyrkúıek kúnderi Atyraý qalasynda taekvondodan Azııa qurlyǵyndaǵy І Ashyq Azııa chempıonaty ótedi. Eresekter arasyndaǵy týrnırge 15 memleketten 400-ge jýyq sportshy qatysqaly otyr. Úsh kúndik dodada Azııa qurlyǵynyń úzdikteri anyqtalatyn bolady. Jarys 7 qyrkúıek kúni 9:00-de Muz saraıynda bastalady. Sonymen qatar, Azııa chempıonatynyń izin sýytpaı, Atyraý qalasynda 9-11 qyrkúıek kúnderi «KAZAKHSTAN OPEN - 2018» halyqaralyq týrnıri ótedi.
Aıta ketý kerek, ótken jyly Atyraýda tuńǵysh ret taekvondodan jastar arasyndaǵy Azııa chempıonaty uıymdastyryldy. Oǵan 26 memleketten 500-ge jýyq sportshy qatysty. Ótken chempıonattyń joǵary dárejede ótýine oraı Atyraý oblysy kezekti Azııa chempıonatyn ótkizýge lıtsenzııa alǵan bolatyn.
