Atyraýda tabystyrý qyzmeti jumys isteı bastady
ATYRAÝ. QazAqparat - Atyraýda medıatsııa qyzmeti jumys isteı bastady, dep habarlaıdy QazAqparat tilshisi.
«Jumys isteı bastaǵanymyzǵa kóp bolmady, biraq adamdardyń qarasy kóbeıe túsýde. Kóbine burynǵy jubaılarynan alımentti óndirip alý máseleleri boıynsha áıelder, sondaı-aq kórshilerimen aradaǵy daý-damaıdy sheshý joldaryn izdegen adamdar júginedi. Ádette, bul daý-damaılar joǵary qabattaǵy turǵyndardyń tómendegi kórshilerin «sý astynda qaldyrý» máselelerimen baılanysty. Budan bólek, kredıttik tarıhtarymen de keledi. Jaqsy tanysyna nemese týysyna nesıe alyp berip, keıin ol tólenbeı, opyq jegen adamdar jıi kezdesedi. Kóp jaǵdaıda máselege tereńirek úńilgen jaǵdaıda, sheshim joldaryn tabýǵa bolady», - deıdi «Medıatsııany damytý ortalyǵy» respýblıkalyq qoǵamdyq birlestiginiń Atyraýdaǵy ókildiginiń dırektory Gúlbarshyn Mardanova.
