Atyraýda sylaqshylar men tas qalaýshylardyń saıysy ótti

ATYRAÝ. QazAqparat – Atyraýda qurylysshylardyń kásibı merekesine oraı sylaqshylar men tas qalaýshylar saıysy ótti. Oǵan qurylys kompanııalarynan 7 komanda qatysty, dep habarlaıdy QazAqparat tilshisi.

Qurylysshylar básekesine oblystyq memlekettik sáýlet-qurylys baqylaý basqarmasynyń bólim basshysy Rústem Mahabaev, sarapshy Talǵat Bısenov pen tehnıkalyq qadaǵalaýshy Qanat Ermuhanov qazylyq etti.

«El aýmaǵyndaǵy boı kótergen ár ǵımaratta, áleýmettik nysanda qurysh qoldy qurylysshylardyń qoltańbasy bar. Qurylys ındýstrııasyn damytýǵa úles qosyp júrgen qurylysshylarǵa da, bárimizge de úlken jaýapkershilik júktelip otyr. Óıtkeni bárimiz túrli maqsattaǵy ǵımarattar men turǵyn úılerdi salyp qana qoımaı, onda jumys isteıtin, turatyn adamdardyń ómiri úshin jaýap beremiz. Al búgingi saıystan soń bir-birińizben tájirıbe almasyp, jumysty sapaly atqaratyndaryńyzǵa senemin», - dedi oblys ákiminiń orynbasary Qaırat Nurtaev.

Oblystyq Qurylys basqarmasynyń basshysy Nurbergen Qusaıynovtyń aıtýynsha, mundaı saıys osymen ekinshi ret ótkizilip otyr. Mundaı saıys qurylysshylardyń biliktiligin arttyrýǵa yqpal etedi.

«Bul saıysty baǵalaýǵa qurylys salasyndaǵy bilikti mamandar shaqyrdyq. Olar saıyskerlerdiń jumysty júrgizý deńgeıine, sapasyna, kirpishti qalaý tásiline, tik jáne kóldeneń tigisti saqtaýyna, syrtqy jáne ishki versttiń túzýligine baǵasyn beredi», -dedi Nurbergen Qusaıynov.

Qazylar sheshimimen obl ystyq saıystyń jeńimpazdary men júldegerleri anyqtaldy. Sylaqshylar arasynan birinshi júldeni «Suńqar qurylys» JShS brıgadasy enshiledi. Al «ARSM» men «BatysAlıansStroı» JShS sylaqshylary ekinshi, úshinshi júldeni jeńip aldy.

Tas qalaýshylar arasyndaǵy saıystyń birinshi júldesi «TSG Construction» JShS komandasyna berildi. «BatysStroıServıs» ben «TarazQurylysInvest» JShS tas qalaýshylary ekinshi jáne úshinshi júldeni ıelendi.

Eske sala ketelik, buǵan deıin Atyraý oblysynda 7 mektep pen 1 japsarjaı paıdalanýǵa beriletinin jazǵan edik.