Atyraýda Sultan Beıbarys meshiti paıdalanýǵa berildi

ATYRAÝ. QazAqparat - Búgin Atyraý qalasynda 1 500 adamǵa shaqtalǵan Sultan Beıbarys meshiti saltanatty jaǵdaıda ashyldy. Qurban aıt merekesi qarsańynda paıdalanýǵa berilgen meshitti jurtshylyqqa jergilikti kásipker Erekeshovter áýleti syıǵa tartty, dep xabarlaıdy QazAqparat tilshisi.

Ortalyq «Imanǵalı» meshitiniń baspasóz-qyzmetiniń xabarlaýynsha, soǵys, eńbek ardargerleri, qoǵamdyq uıymdar, zııaly qaýym ókilderi jáne jergilikti jamaǵat qatysqan saltanatty shara Quranmen bastaldy. Jergilikti  jurtshylyqty quttyqtaǵan Qazaqstan musylmandary dinı basqarmasynyń Atyraý oblysy boıynsha ókili, ortalyq «Imanǵalı» meshitiniń Bas ımamy Batyrjan qajy Mansurov qulshylyq orny rýhanııattyń ordasyna aınalaryna senim bildirdi.

«Paıǵambarymyz (s.ǵ.s) óziniń hadısinde «Kimde kim Allanyń dıdaryn qalap, meshit turǵyzsa, Alla Taǵala oǵan jánnatta dál osyndaı úı turǵyzady» dep súıinshilegen bolatyn. Asylynda, meshit - tárbıe oshaǵy. Meshit - adamnyń rýhanı ımmýnıtetin kóteretin, jaqsylyqqa shaqyryp, jamandyqtan tııatyn, izgilikti nasıhattaıtyn kıeli orda. Meshit tarıhymyzda erekshe orny bar tulǵa Sultan Beıbarys babamyzdyń esimimen ataldy. Bul da bolsa urpaqtar sabaqtastyǵynyń kórinisi», - dep atap ótken Bas ımam atyraýlyqtarǵa Qazaqstan musylmandary dinı basqarmasynyń Bas múftıi Serikbaı qajy Orazdyń sálemin jetkizdi. Jáne jergilikti jurtshylyqqa jańa meshittiń Bas ımamy Erjan Qaǵazǵalıevty tanystyrdy.

Meshittiń ashylý saltanatyna Atyraý oblysy Din isteri basqarmasynyń basshysy Haırolla Kóshqalıevtyń arnaıy qatysty.

«Sultan Beıbarys meshiti Atyraý qalasyndaǵy jetinshi meshit bolyp otyr. Bul Atyraý jurtshylyǵy ǵana emes, barsha musylman qaýymǵa jasalyp otyrǵan erekshe jaǵdaı. Elimizde dindi órkendetýge barlyq múmkindik jasalýda», - dedi Haırolla Kóshqalıev.

Saltanatty jaǵdaıda paıdalanýǵa berilgen meshittiń lentasyn qııý qurmeti Atyraý qalalyq soǵys jáne eńbek ardagerleri keńesiniń tóraǵasy Álipqalı Bekesh pen UOS ardageri Orynǵalı Qarasaevqa usynyldy.

Atyraý qalasynyń Azııa betkeıinen ashylǵan Sultan Beıbarys meshiti janynan munara turǵyzylyp, kúmbezder ornatylatyn bolady. Qos qabatty ǵımarattyń syıymdylyǵy. Ǵıbadat úıinde Quran oqıtyn bólme, erler jáne áıelder zaly, meshit mamandarynyń qyzmettik bólmeleri bar.

Eske sala ketelik, buǵan deıin Atyraýda qalalyq Quspan molla meshiti qaıta jańǵyrtylyp, kúrdeli jóndeýden soń paıdalanýǵa berilgen bolatyn.