Atyraýda sýǵa batyp bara jatqan balaly áıel qutqaryldy
Áleýmettik jeli qoldanýshysy Aısulý Úsenbaevanyń Facebook-tegi paraqshasynda jazǵanyndaı, oqıǵa keshe, 23 shildede bolǵan.
«Men anammen jáne 4 jasar ulymmen serýendeýge shyǵyp, ózen jaǵasyna bardyq. Ulym ekeýmiz Avangard aýmaǵyndaǵy jaǵalaýda sýǵa tas laqtyrdyq. Tómenge tústik. Jasandy kópirge jaqyndadyq. Ol sýdy jaqsy kóredi. Kenet ulymdy qalaı jibere salǵanymdy baıqamadym. Bul – meniń qateligim. Ulymdy sýdan shyǵarý úshin ózim de ózeenge sekirdim», - deıdi Aısulý Úsenbaeva.
Ol balasyn sýdan joǵary kóterip, jaǵaǵa jetpek bolǵan. Alaıda, jaǵalaýǵa jete almaı, kómek surap, aıqaılaǵan. Ótip bara jatqan jas jigit ony ulymen birge qutqaryp qalǵan.
«Bul – óte qorqynyshty jaıt. Ústimdegi kıimniń qaltasynda telefon men kiltter bar edi. Túsip qalmaǵanyna tańdandym. Bizdi qutqarǵan jigitke de, sý ári las kıimmen taksıge otyrǵyzǵan júrgizýshige de raqmet. Qıyn kezde kómek beretin adamdar bolǵany qandaı jaqsy», - deıdi Aısulý Úsenbaeva.
Eske sala ketelik, budan buryn Atyraý oblysy sý aıdyndarynda shomylýǵa qaýipti 70 ýchaske baryn habarlaǵan bolatynbyz. Atyraý oblystyq tótenshe jaǵdaılar departamentti qoǵammen baılanys tobynyń málimetinshe, onyń ishinde Atyraý qalasynda 17, Inder aýdanynda 10, Mahambette – 19, Qurmanǵazyda – 2, Jylyoıda – 7, Qyzylqoǵada aýdanynda 15 qaýipti ýchaske bar. Qaýipti ýchaskelerge 238 tyıym salý belgisi men 9 aqparattyq stend ornatylǵan.
