Atyraýda sýǵa batqan balyqshynyń denesi tabyldy
ATYRAÝ. QazAqparat - Atyraý oblysynda eki kún ishinde eki adam sýǵa ketti, dep habarlaıdy QazAqparat tilshisi.
Birinshi jaǵdaıda 34 jastaǵy er adamnyń máıitin aýyl turǵyndary taýyp alǵan.
«Qaıǵyly oqıǵa keshe saǵat 18.35-te Qyzylqoǵa aýdany, Mııaly aýylyndaǵy Oıyl ózeninde bolǵan. 1984 jylǵy er azamat shomylýǵa tyıym salynǵan jerde sýǵa batyp ketken. Jergilikti turǵyndar jas jigittiń máıitin ózennen tapty. Turǵyndardyń aıtýynsha, marqum mas bolǵan. Turǵyndar saǵat 19.00-de máıitti sýdan shyǵaryp, polıtsııa qyzmetkerlerine tapsyrdy», - dep habarlady oblystyq TJD baspasóz qyzmetinen.
Ekinshi adamnyń máıiti Atyraý qalasyndaǵy «Retro park» mańyndaǵy Jaıyq ózeninen tabyldy. Ony taýyp, jaǵaǵa shyǵarǵan Batys óńirlik aeroutqyr jedel-qutqarý jasaǵynyń qutqarýshylary. Sýǵa batqan er adam balyq aýlaý kezinde batyp ketken.
«46 jastaǵy er adamnyń máıiti 11 shilde kúni saǵat 10.35-de «Retro park» mańynda tabyldy. Balyqshy 9 shilde kúni eki kún buryn sýǵa batyp ketken. Balyqshynyń denesi sýdan shyǵarylyp, polıtsııa qyzmetkerlerine tapsyryldy», dep habarlady oblystyq TJD baspasóz qyzmetinen.
