Atyraýda sýburqaqtar qurylysyn júrgizgen merdigerdi tekserý júrgizilýde
Atyraý qalalyq ákimdigi baspasóz qyzmetiniń málimetinshe, 2018 jyly 9 sýburqaq qurylysynyń jobasy ázirlengen. Tapsyrys berýshi – qalalyq qurylys bólimi, al, merdiger «Eńbek» RMK. Qurylys jumystaryn júrgizý úshin kelisimshart 2019 jylǵy 23 mamyrda jasalǵan.
«Jobaǵa sáıkes, sýburqaqtar qurylysy Balyqshy kentindegi A.Qunanbaev kóshesinde, Qurmanǵazy atyndaǵy, Q.Smaǵulov atyndaǵy skverde, Qurmanǵazy atyndaǵy mádenıet úıi ǵımaratynyń aldynda, Avangard shaǵyn aýdanyndaǵy Jeńis saıabaǵynda, Sátpaev kóshesinde ornalasqan D.Nurpeıisova atyndaǵy mýzykalyq akademııa ǵımaratynyń aldynda júrgiziledi. Byltyr, 2020 jyldyń mamyr aıynda sybaılas jemqorlyqqa qarsy qyzmet merdigerdiń bıýdjet qarajatyn jymqyrý faktileri boıynsha sotqa deıingi tergep-tekserýdi bastady. Sonyń saldarynan qurylys toqtatyldy» -dep habarlady ákimdiktiń baspasóz qyzmeti.
Belgili bolǵandaı, kelisimsharttyń jalpy somasy 1 092 482 277,60 teńgeni quraǵan. Al, oryndalǵan jumystar aktisine sáıkes 2019 jyly merdiger mekemege 816 070 000 teńge aýdarylǵan.
«Búginde aqaý tizimdemesi toltyrylýda. Sonyń negizinde tehnıkalyq tekserý júrgiziledi. Qorytyndy alynǵannan keıin qurylysty jalǵastyrý úshin jobalyq-smetalyq qujattama ázirlenedi. Merdiger uıym oryndalmaǵan jumystardyń qunyna sáıkes memlekettik satyp alý boıynsha ótkiziletin konkýrsta anyqtalady. Sýburqaqtardy qaıta jańartý tehnıkalyq tekserýden keıin kelisimsharttaǵy qalǵan qarjyny jumsaý arqyly aıaqtalady», - dep málim etti ákimdiktiń baspasóz qyzmetinen.