Atyraýda sý jáne káriz jelisine tarıfter qymbattady
«Atyraý oblysy Sý arnasy» KMK baspasóz qyzmetiniń málimetinshe, jańa tarıf bıylǵy 1 qyrkúıekte engiziledi. Bul tarıf 2028 jylǵy 30 sáýirge deıin ózgermeıdi.
Taratý jelileri jáne magıstraldyq qubyrlarmen sý berý, Atyraý qalasy men Maqat aýdany boıynsha aǵyndy sýlardy burý jáne tazartý boıynsha retteletin qyzmetterge jańa tarıfter engizildi. Sýmen qamtýdyń baǵasy 22%, al káriz jelisiniń tarıfi 28% qymbattap otyr.
«Tarıfterdiń kóterilýiniń basty sebebi – kásiporynnyń turaqtylyǵy men kórsetiletin qyzmetterdiń sapasyna qaýip tóndiretin jalaqynyń tómendigine baılanysty kadrlardyń aýysýy. Jańa tarıftiń esebinen óndiristik personaldyń ortasha jalaqysy 72% artady. Al ákimshilik qyzmetkerlerdiń ortasha jalaqysy 9% kóteriledi» - delingen «Atyraý oblysy Sý arnasy» KMK aqparatynda.
Qazir sý úshin tarıf bir tekshe metrine 89,23 teńgeni quraıdy. Endi ol 108,98 teńgege ósedi. Káriz jelisine tarıf bir tekshe metrine 34,75 teńge bolsa, 1 qyrkúıekten 59,08 teńgege ózgeredi.
Eske salaıyq, buǵan deıin Atyraý oblysynda elektr qýatynyń tarıfi 12,17 paıyzǵa qymbattaǵanyn habarlaǵan edik.
Sondaı-aq jylýdyń baǵasy 22,5 paıyzǵa óskenin jazǵan bolatynbyz.
