Atyraýda stýdentter jataqhanasynan órt shyqty

ATYRAÝ. QazAqparat – Atyraýdaǵy stýdentter jataqhanasynan órt shyqty, dep habarlaıdy QazAqparat.

Órt H. Dosmuhamedov atyndaǵy Atyraý memlekettik ýnıversıtetine tıesili Stýdentter kóshesindegi 4 qabatty ǵımarattyń birinshi qabatynda bolǵan.

Kómek kelgenge deıin ǵımarattyń 1 jáne 2 qabatynan - 36 adam, onyń ishinde 8 bala óz betinshe evakýatsııalanǵan.

Qazirgi ýaqytta jataqhanada stýdentter joq.

«Munda oqytýshylar quramynyń 21 otbasy turady. Qaza bolǵandar men zardap shekkender joq. Tilsiz jaýdyń yqtımal sebebi – tasymaldy uzartqyshtyń qysqa tuıyqtalýy» dep habarlady óńirdiń tótenshe jaǵdaılar departamentiniń baspasóz qyzmeti.

Órtti sóndirýge Atyraý oblysy tótenshe jaǵdaılar departamentiniń 6 avtotehnıkasy men 20 qyzmetkeri shyqty.