Atyraýda stýdent qyzǵa qaraqshylyq shabýyl jasaǵandar ustaldy
ASTANA. 27 aqpan. QazAqparat - Atyraý qalasynda stýdent qyzǵa qaraqshylyq shabýyl jasap, 445 myń teńgeniń dúnıe-múlkin qoldy etkender ustaldy.
Bul týraly búgin QR ІІM-niń málimetterinde habarlandy.
«Jábirlenýshiniń ata-anasy tańǵy saǵat 8.30 shamasynda jumystaryna shyǵyp ketken, artynsha esik qaıta qaǵylǵan. «Ákeńiz jumsady» dep, esikti ashtyrtqannan keıin betterin medıtsınalyq betperdelermen tumshalaǵan 4 adam úıge basa kóktep kirgen. Pyshaqpen qarýlanǵan qaraqshynyń bireýi jábirlenýshini qonaq kútý bólmesine alyp ketedi de, qalǵan úsheýi úıdi tinte bastaıdy. 10 mınýttan soń qaraqshylar úıden altyn buıymdar, noýtbýk jáne 3 myń teńgeni qoldy qylyp, belgisiz baǵytta izderin jasyrady»,-delingen taratylǵan málimetterde.
Odan bólek, sol kúni kúdiktiler zeınetkerdiń úıine de qaraqshylyq shabýyl jasaǵan. Alaıda, aqsaqal qarsylyq kórsetip, olardyń biriniń betperdesin sypyryp alǵan. Jedel-izdestirý is-sharalaryn júrgizý barysynda, 18-25 jas aralyǵyndaǵy Atyraý oblysynyń 7 turǵyny quryqtalyp, ýaqytsha ustaý abaqtysyna qamaýǵa alyndy. Kúdiktiler qolǵa túsken jaldamaly páterden travmatıkalyq tapansha, úsh dana as úı pyshaǵy men noýtbýk tabylyp, tárkilendi. Qazirgi ýaqytta olardyń osyǵan uqsas basqa da qylmystarǵa qatystylyǵy tekserilýde.
