Atyraýda sport úıirmeleri bıýdjet qarjysyn jymqyrǵan

ATYRAÝ. QazAqparat – Atyraýda kásipkerler sport úıirmelerindegi bilim alýshylar tizimine «óli jandardy» engizip, bıýdjet qarajatyn zańsyz ıemdenip kelgen, dep habarlaıdy QazAqparat.

Atyraý oblystyq prokýratýrasynyń baspasóz qyzmetinen málim etkendeı, kásipkerler osyndaı ádispen 405 423 teńgeni zańsyz ıemdengen. Prokýrorlyq den qoıý sharalarymen atalǵan qarjy bıýdjetke qaıtarylǵan.

«Memleket basshysy Qasym-Jomart Toqaev bıylǵy jyldy «Balalar jyly» dep jarııalap, Úkimetke az qamtylǵan jáne kóp balaly otbasylardan shyqqan daryndy balalardy qoldaý jónindegi Jol kartasyn ázirleýdi tapsyrǵan edi. Osyǵan baılanysty atalǵan sanattaǵy balalardyń úıirmelerge, ortalyqtar men jazǵy lagerlerge barý múmkindigin qamtamasyz etý kózdelgen. Taldaý qorytyndysymen Atyraý oblysy dene shynyqtyrý jáne sport basqarmasynyń sporttyq is-sharalarǵa bólingen bıýdjet qarajatyn kásipkerlerdiń zańsyz ıemdený faktileri anyqtaldy. Zańnamamen alynyp tastalǵan «ózge de shyǵyndardy» negizsiz qosý esebinen balalar mýzykalyq mektepterinde oqytý boıynsha kórsetiletin qyzmetterdiń baǵasyn zańsyz kótergeni belgili boldy», -dep habarlady oblystyq prokýratýranyń baspasóz qyzmeti.

Atyraý qalalyq prokýratýrasynyń prokýrorlyq qadaǵalaý aktisin qaraý nátıjesimen qalalyq saz mektepterinde baǵany 10%-dan astam kóterýge qatysty zańsyz tájirıbesiniń joly kesilip otyr. Osylaısha qoljetimdi bilim alý qamtamasyz etilgen 2 730 balanyń quqyǵy qorǵaldy.

Eske sala ketelik, buǵan deıin Atyraýda ıt atylǵan jóninde qujatpen kásipkerge aqsha aýdarylǵanyn habarlaǵan edik.