Atyraýda «Sport Covid-19 ınfektsııasyna qarsy» júgirý aktsııasy ótti
Oblystyq sport jáne dene shynyqtyrý basqarmasy baspasóz qyzmetiniń málimetinshe, júgirý aktsııasyna Atyraý qalasynyń 100-den astam turǵyny qatysqan.
«Búgingi aktsııany ótkizýdegi maqsat – buqaralyq sport pen salaýatty ómir saltyn nasıhattap, turǵyndardyń densaýlyǵyn jaqsartýy men belsendiligin qalyptastyrýyna yqpal etý. Júgirý aktsııasy Q.Smaǵulov alańynan bastalyp, «Atyraý» sport keshenine deıin jalǵasty. Márege erler arasynan Marat Orazalıev birinshi jetti. Al, Qanat Seıilhan men Nurmahan Álıev ekinshi jáne úshinshi oryndardy bólisti. Áıelder arasynda Rysjan Ibatova jeńimpaz atandy. Zamıra Ǵabdol ekinshi, Nursulý Jumabaeva úshinshi júldege ıe boldy», - dep habarlady basqarmanyń baspasóz qyzmeti.
Sondaı-aq, ardager boksshy Adık Bermeshov «Eń eresek qatysýshy», al, Aıbek Demegenov «Eń jas qatysýshy» júldesimen marapattaldy.
Eske sala ketelik, budan buryn Atyraý oblysy turǵyndarynyń 36 paıyzy sportpen shuǵyldanatynyn jazǵan bolatynbyz.
