Atyraýda «sóıleıtin» aıaldama paıda boldy
ATYRAÝ. QazAqparat – Atyraý qalasynda «sóıleıtin» aıaldama paıda boldy, dep habarlaıdy QazAqparat.
Atyraý qalalyq ákimdigi baspasóz qyzmetiniń aqparatyna súıensek, Avangard-4 shaǵyn aýdanyndaǵy «Perzenthana» aıaldamasyna arnaıy aqparattyq tablosy bar taqta ornatylǵan. Bul – qaladaǵy alǵashqy pılottyq joba.
«Aqparattyq taqta qala ákiminiń bastamasymen ornatyldy. Ony «Smart Atyraý» KMM ázirledi. «Perzenthana» aıaldamasyndaǵy aqparattyq tabloda marshrýt nómiri, sońǵy aıaldama men avtobýstyń keletin ýaqyty kórsetiledi. Al, nashar kóretin jáne zaǵıp jandar úshin dybys nusqasy bar. Daýyspen habarlaý eki tilde – qazaqsha jáne oryssha aıtylady. Atalǵan derekterdi bilý úshin sary núkteni basý qajet. Bul erekshe qajettiligi bar adamdarǵa qoljetimdi orta qurý úshin jasaldy», - dep habarlady qalalyq ákimdiktiń baspasóz qyzmeti.
Eske sala ketelik, budan buryn Atyraýda metanmen júretin avtobýstar jolǵa shyqqanyn habarlaǵan edik.
