Atyraýda sotqa deıingi tatýlasý kabınetteri ashyldy
ATYRAÝ.QazAqparat - Atyraýda sotqa deıingi tatýlasý kabınetteri ashyldy, dep habarlaıdy QazAqparat tilshisi.
Jıyn barysynda oblystyq sot tóraǵasy Marǵulan Bekturǵanov kásibı medıatorlarmen kezdesip, «Sot júıesiniń 7 túıini» jobasy sheńberinde Atyraý qalalyq sotynyń ǵımaratynda zamanaýı negizde jabdyqtalǵan kásibı medıatorlarǵa jáne sot medıatsııasyna arnalǵan kabınetter ashylǵanyn atap ótti.
«Óńirdegi medıatorlardyń jumysy jaqsy nátıjeler berip otyr. Buǵan statıstıkalyq málimetter dálel, 2017 jyly sotqa deıingi medıatsııa tártibinde 1429 is, osy jyldyń tórt aıynda shamamen 400 daýdy qaraý aıaqtalǵan. Biz medıatsııany damytý boıynsha jumystardy odan ári jalǵastyrýǵa nıettimiz. Sol úshin de azamattar arasyndaǵy kıkiljińderdi tez ári tıimdi sheshýge barlyq jaǵdaıdy jasaýǵa tyrysamyz, - dedi M.Bekturǵanov.
Búginde Atyraý qalalyq sotynyń ǵımaratynda tórt tatýlasý kabıneti ashylǵan. Olardyń ekeýinde kásibı medıatorlar, al qalǵan ekeýinde sýdıa medıatorlar jumys isteıdi. Sondaı-aq, jumystyn nasıhattaý maqsatynda sotta jáne qaladaǵy teleekrandarda atalǵan kabınetterdiń qyzmeti týraly qysqametrajdy beınerolıkter kórsetilýde.
Óz kezeginde medıatorlar tatýlastyrý rásimi ınstıtýtyn damytýdaǵy belsendiligi úshin sot korpýsyna alǵysyn bildirdi.
Aldaǵy ýaqytta, Kásipodaq ortalyǵy men Dostyq úıi janynda osyndaı tatýlasý kabınetteri ashylady dep josparlanyp otyr.
