Atyraýda sońǵy eki jylda alǵash ret úshem dúnıege keldi

ATYRAÝ. QazAqparat – Atyraýda úshem dúnıege keldi. Bul – sońǵy eki jylda ómirge kelgen alǵashqy úshem, dep habarlaıdy QazAqparat tilshisi.

Atyraý oblystyq perınataldyq ortalyǵynda 22 jastaǵy Aıangúl Sábıtova úshemdi dúnıege ákelgen.

8 qyrkúıek - Otbasy kúni qarsańynda jaryq dúnıe esigen ashqan nárestelerdiń úsheýi de ul. Sábılerdiń ekeýiniń salmaǵy – 1 keli 800 gramm, úshinshisi – 2 keli 200 gramm.

«Qazir jas ananyń da, nárestelerdiń de jaǵdaıy jaqsy. Úshem anasynyń qasyna shyǵaryldy. Jas anaǵa nárestelerdi kútip-baǵýǵa, em-dom jasaýǵa arnaıy medbıkeler bólindi. Sábıler perzenthana dárigerleriniń baqylaýynda alynǵan. Ázirge úıge qashan shyǵatyny belgisiz», -dedi perınataldy ortalyqtyń shala týǵan náresteler patologııasy, II kezeń kútim bólimshesiniń meńgerýshisi Túrlen Begeeva.

Jas anaǵa júktiliktiń 34-aptasynda kesar tiligi arqyly ota jasalǵan.

Shuǵyl otaǵa ortalyq dırektorynyń orynbasary, bilikti akýsher-gınekolog dáriger Asqar Kenjeǵalıev jetekshilik etken.

Atyraý oblysynda jyl basynan bergi segiz aıda 11 333 sábı dúnıege kelgen.

Onyń ishinde 114 egiz bar. Byltyrǵy osy kezeńde 109 egiz jaryq dúnıe esigin ashqan. Al, úshem bıyl alǵash ret tirkelgen.