Atyraýda soǵys jyldarynda 10-nan astam gospıtal jumys istegen
Oblystyq memlekettik arhıvtiń bólim basshysy Raısa Tastemirovanyń málimetinshe, Qazaqstan KP(b) OK-niń 1941 jyly 20 shildedegi qaýlysyna sáıkes, Densaýlyq saqtaý halyq komıssarıaty 1941 jyldyń 10 qazanynda Halyq komıssarynyń orynbasary S.Mılovıdov basqarǵan evakýatsııalyq gospıtaldardyń basqarmasyn qurady.
Osyǵan sáıkes Gýrevte (Atyraý) gospıtaldar basqarmasy qurylǵan.
«Arhıv qujattarynda Atyraý oblysynda 11-12 evogospıtaldyń jumys istegeni týraly derek bar. Gýrev oblystyq densaýlyq saqtaý bóliminiń 1942 jylǵy 1 mamyrdaǵy №132 buıryǵymen evagospıtaldardyń 6 adamnan quralǵan gospıtaldar keńesi qurylady. Onda Gýrev oblysyndaǵy gospıtaldar keńesi tóraǵasy P.Lıapın, orynbasary K.Leshakova, jaýapty hatshy – bas hırýrg A.Romakov, keńes músheleri №3946 gospıtal bastyǵy A.Gerenrot, №4116 gospıtal bastyǵy I.Shereshevskaıa, oblystyq densaýlyq saqtaý bóliminen dáriger Ázen Aqberdına engen. Sonymen qatar, Gýrev oblystyq densaýlyq saqtaý bóliminiń 1941 jylǵy 26 jeltoqsandaǵy №508 buıryǵymen, evagospıtaldarynyń bas hırýrgi bolyp, 2 rangaly áskerı dáriger Alekseı Romakov taǵaıyndalǵan» deıdi Raısa Tastemirova.
Onyń aıtýynsha, oblystyq arhıvtiń qor qujattarynda Gýrev oblysyna evakýatsııamen kelgen gospıtaldardyń ornalasýy, onda jumys istegen jaýapty dárigerler týraly qundy derek bar.
«Máselen, Pıonerler úıinde ornalasqan №2967 gospıtaldyń bastyǵy 3-shi rangty áskerı dáriger K.Leshakova taǵaıyndalǵan. Astrahan qalasynan Gýrevke kóshishirilgen №2102 gospıtal Munaıshylar klýbyna ornalastyrylyp, bastyǵy áskerı dáriger B.Rýtberg bolǵan. Keıinnen bul gospıtal taratylyp, B.Rýtberg №2103 gospıtaldyń basshylyǵyna aýysqan. Al, №4116 gospıtaldy áskerı dáriger I.Shereshevskaıa basqarǵan» deıdi ol.
Áskerı dáriger Ida Shereshevskaıa 1908 jyly 20 jeltoqsanda Belorýssııada týǵan. 1938 jyldary Odessa medıtsınalyq ınstıtýtyn bitirgen.
Eńbek jolyn sol kezdegi Gýrev qalasyndaǵy «Embaneft» kásipornynyń emhanasynda bastaǵan. Keıin №2 emhananyń dırektory qyzmetin atqarǵan.
Sondaı-aq, №4038 (bastyǵy Ts.Rogova) №3941 (bastyǵy O.Şıt) №3946 (bastyǵy A.Gerenrot, keıin I.Lıfshıts), №1383 (bastyǵy N.ıAkımova), №3239 (bas dárigeri Ivanov), №4469 (bastyǵy A.Shınıaev) bolǵan.
«Soǵystyń alǵashqy kezinde Gýrev qalasynda 1941 jylǵy 11 qarashada evapýnkt ashylǵan. Onyń quramynda medpýnkt pen 24 kereýetti ızolıator bolady. Al, №1077 gospıtal Maqat aýdanyndaǵy Dossor kentinde ornalasqan. Ony K.Stashevskıı degen dáriger basqarǵan. Gospıtaldardaǵy dárigerler, medbıkeler, sanıtarkalar soǵys dalasynan kelgen jaraly jaýyngerlerdi emdep, qatarǵa qaıta qosý úshin janqııarlyqpen eńbek etedi. Soǵys jyldarynda basqa qalalardan evakýatsııamen kelip, áskerı gospıtaldarda adam janynyń arashasy bolǵan dárigerler jaıly muraǵattyq qujattar bar. Solardyń qatarynda Z.Medvedev, A.Mışerın, K.Perelyshteın, R.Stoıanovskaıa, P.Klıgerman, N.Lysenko, S.Lıýbanskaıa, P.Gelıkman, E.Ýsagına, T.Býlıch, M.Braýde, A.Motov, L.Kıselov, P.Kojevnıkov, R.Shvarıman, F.Fısher, E.Savronskaıa sekildi bilikti dárigerler eńbek etken» deıdi Raısa Tastemirova.
Raısa Tastemirovanyń deregine súıensek, 1941 jyly Gýrev oblysyna Voronej qalasynan mektepke deıingi jastaǵy 81 bala men 17 tárbıeshi maman evakýatsııalanǵan.
Olar Inder aýdanynyń Órlik aýylyndaǵy balalar úıine jiberilgen.
Voronej qalasynan evakýatsııalanǵan estý qabileti shekteýli 68 oqýshy men olardy kútýshi 24 qyzmetker Gýrev qalasynan 4 shaqyrym qashyqtaǵy Somovem kásipshiligindegi mektep ǵımaratyna ornalastyrylǵan.
