Atyraýda sıyrǵa, sosyn júk kóligine soǵylǵan Toyota Camry júrgizýshisi mert boldy
ATYRAÝ. QazAqparat – Atyraýda sıyrǵa, sosyn júk kóligine soǵylǵan Toyota Camry júrgizýshisi mert boldy. Eki jolaýshy jaraqat aldy, dep habarlaıdy QazAqparat tilshisi.
Atyraý oblystyq polıtsııa departamenti baspasóz qyzmetiniń málimetinshe, jol-kólik oqıǵasy keshe, 24 tamyzda bolǵan.
«Jergilikti ýaqytpen túngi saǵat 22:10 shamasynda respýblıkalyq mańyzy bar Aqtóbe-Atyraý-Reseı shekarasy (Astrahan baǵyty) tas jolynyń 430-shaqyrymy tusynda Toyota Camry avtokóligi áýeli joldan ótip bara jatqan sıyrdy qaǵyp ketken. Sodan soń soqqy ekpinimen qarsy jolaqta kele jatqan Mercedes júk kóligimen túıisken. Jol-kólik oqıǵasynyń saldarynan Toyota Camry avtokóliginiń 1988 jylǵy júrgizýshisi dene jaraqatyn alyp, oqıǵa ornynda mert boldy. Jeńil kóliktegi 2 jolaýshy ártúrli dene jaraqatyn aldy» dep habarlady departamenttiń baspasóz qyzmeti.
Budan buryn Atyraý oblysynyń trassasynda 2 adam mert bolyp, úsheýi aýrýhanaǵa túskenin habarlaǵan edik.
«Jol apaty dál osy tasjolda tirkelgen. Atalǵan joldyń 635-shaqyrymy tusynda Toyota Prada jáne Lada Granta avtokólikteri soqtyǵysty. Saldarynan Lada Granta avtokóligindegi 2 jolaýshy oqıǵa ornynda mert boldy. Al Lada Granta júrgizýshisi men Toyota Prada kóliginiń 2 jolaýshysy oblystyq aýrýhanaǵa jetkizildi», - dep habarlaǵan edi departamenttiń baspasóz qyzmetinen.
