Atyraýda sıntetıkalyq esirtki satqan tórt eresek adam 10, bir jasóspirim 3 jylǵa sottaldy

ATYRAÝ. QazAqparat – Atyraýda sıntetıkalyq esirtki satqan 4 tarazdyq jigit 10, jasóspirim úsh jylǵa sottaldy, dep habarlaıdy QazAqparat tilshisi.

Atyraý oblystyq polıtsııa departamentiniń baspasóz qyzmetinen málim etkendeı, bıylǵy qańtarda sıntetıkalyq esirtkini satyp júrgen 4 adam ustalǵan.

«Esirtki qylmysyna qarsy is-qımyl jáne jergilikti polıtsııa qyzmeti basqarmasy qyzmetkerleri Atyraý qalasynda ınternet jelisi arqyly jáne jasyryn tyǵý ádisimen sıntetıkalyq esirtki zattaryn satýmen aınalysqan Taraz qalasynyń tórt turǵynyn ustaǵan edi. 29, 22 jáne 19 jastaǵy kúdiktilerden 1 keliden astam sıntetıkalyq esirtki tárkilendi. Medıtsınalyq saraptama qorytyndysyna sáıkes sıntetıkalyq esirtkiniń 655,0623 gramy «Alfa-PVP», al, 482,6133 gramy mefedron ekeni dáleldendi», -dep habarlady departamenttiń baspasóz qyzmeti.

Kúdiktilerge qatysty QR Qylmystyq kodeksiniń 297-babynyń 3-bóligimen qylmystyq is tergelgen. Sot sheshimimen Taraz qalasynyń tórt turǵynyna 10 jylǵa bas bostandyǵynan aıyrý jazasy berildi.

Sondaı-aq, naýryzda esirtki jasyryn orynǵa tyǵyp júrgen kámeletke tolmaǵan jasóspirim anyqtalǵan.

«Qala aýmaǵynda sıntetıkalyq esirtkini jasyryn tyǵýmen aınalysyp júrgen 17 jasar jasóspirimnen 26,7022 gramm «Alfa-PVP» sıntetıkalyq esirtkisi, ızolentpen býylyp-túıilgen 16 orama tárkelendi. Jasóspirim áleýmettik jelidegi «OLX» paraqshasy arqyly «Mefedron» sıntetıkalyq esirtkisin jasyryn orynǵa tyǵyp, zańsyz jolmen aqshalaı paıda tabýdy kózdegenin moıyndady», -dep málim etti departamenttiń baspasóz qyzmeti.

Kúdikti jasóspirim QR Qylmystyq kodeksiniń 297-babynyń 3-bóligimen kináli dep tanylǵan. Sot sheshimimen oǵan úsh jyl merzimge bas bostandyǵynan aıyrý jazasy taǵaıyndaldy.

Eske sala ketelik, budan buryn Atyraýda 6 aıda esirtkini zańsyz satý, taratý qylmysymen 30 adam sottalǵanyn jazǵan edik.