Atyraýda shyrsha satyp alýǵa qarjy bólinbeıdi

ATYRAÝ. QazAqparat- Atyraýda úsh jyl qatarynan ortalyq alań 2017 jyldyń sońynda satyp alynǵan shyrshamen bezendirilmek, dep habarlaıdy QazAqparat tilshisi.

Aǵymdaǵy jyly Atyraýda jańa jyldy atap ótý úshin 6 jer anyqtaldy: Isataı-Mahambet jáne D. Nurpeıisova atyndaǵy alańda, Nursaıa jáne Balyqshy yqsham aýdanynda, M. Ótemisuly atyndaǵy akademııalyq qazaq drama teatrynyń jáne Qurmanǵazy mádenıet saraıynyń aldynda ornatylatyn bolady. «Qalanyń kórkin keltirý maqsatynda turǵyndar kóp shoǵyrlanǵan jerlerge kishi arhıtektýralyq keskinder ornatylady. Jalpy, qalany jańa jyldyq bezendirýge jergilikti bıýdjetten 18 mıllıon teńge bólindi», - dep habarlady Atyraý qalasy ákimdiginiń baspasóz qyzmeti. Sonymen qatar, bıyl jergilikti bılik jańa jyldyq shyrshany satyp alýdan bas tartty. Úshinshi ret, 2017 jyldyń sońynda alynǵan jańa jyldyq shyrsha ortalyq alańǵa ornatylady. Qala turǵyndary men qonaqtary úshin jańa jyldyq merekelik sharalar 31 jeltoqsanda Isataı-Mahambet alańynda ótedi. Merekeniń bastalýy keshki saǵat 20.00-ge josparlanǵan.